Røkke-tårnet var planlagt med 60 etasjar, altså over 200 meter høgt. I bakgrunnen; Lyseparken. (Ill: Rev Ocean/Abo)
Røkke-tårnet var planlagt med 60 etasjar, altså over 200 meter høgt. I bakgrunnen; Lyseparken. (Ill: Rev Ocean/Abo)

«Det store blå» blir neppe bygd i Lyseparken

Vil redusera høgda og bygga nær hovudstaden.

Kjetil Vasby Bruarøy
16. januar 2020 - 12:19

I oktober 2018 presenterte Røkke-selskapet REV Ocean planar om å bygga «World Ocean Headquarters» (WOH), ein skyskrapar på 60 etasjar (over 200 meter høg) som skal husa internasjonale, leiande miljø innan havforsking, utdanning og kompetansebedrifter. Selskapet leiar frå før arbeidet med og drifta av forskings- og ekspedisjonsskipet REV (Research Expedition Vessel).

I februar i fjor sa Terje Søviknes at han ikkje var framand for å undersøkja om Lyseparken kunne vera passande destinasjon for The Big Blue, i mars var han, saman med Lyseparken-direktør Fredrik Seliussen, i møte på Fornebu med Nina Jensen og kommunikasjonsrådgjevar Marianne Stigset hos Rev Ocean.

I august fekk Os kommune brev frå REV Ocean der dei takka for interessa dei har vist, og der REV fortalde om prosessen vidare. I brevet gjekk det fram at Lyseparken skåra bra på nesten alle punkt.

Reduserer høgda

Røkke og Rev Ocean hadde i utgangspunktet ambisjonar om å bygga «Det Store Blå» på Fornebu, men  politikarane i Bærum stilte krav om å begrensa høgda.

Fleire byar og bygder i og utanfor Noreg hamna på friarføter for å få tak i det spektakulære prosjektet og dei planlagte 3000 arbeidsplassane.

Men leiar i Rev Ocean, Nina Jensen, seier no at det ikkje blir noko Røkke-tårn.

– Vi vil ikkje bygga huset 250 meter høgt, men vi vil halda på volumet, 60.000 til 80.000 kvadratmeter, i ei anna utforming, seier Jensen til Fiskeribladet.

Vil bygga nær Oslo

Ho legg til at dei framleis meiner det ville vore mest berekraftig å bygga høgt, fordi det krev mindre areal, men at Noreg ikkje er klar for dette.

Planane om å bygga andre stadar enn nær Oslo er òg skrota.

Målet er å få lokalisasjon avgjort i løpet av første halvår 2020.