– Dette blir årets bestseljar

Bildeserie:

1 av 8

Trass låg oljepris og låg kronerkurs har Askeladden Boats lykkast både i å koma over 100 millionar kroner i omsetnad igjen, for første gong sidan 2012, og gå med millionoverskot for første gong på fleire år.

– Båtmarknaden har vore tøff, men vi klarte oss godt gjennom 2015. Den varme sommaren i 2014 var nok med på å gje oss ein god start på fjoråret, lansering av C61 var med på å gje oss eit godt årsresultat, seier Jonathan Dyrstad frå salsavdelinga Båtens Beste på vegne av fabrikken.

Fabrikken selte over 300 båtar i fjor. Den dei selte flest av var den nye modellen C61. Minstemann i flåten blei lansert i fjor, i tre variantar, Center Console, Cruiser og BowRider, og er basert på same design som C75, som året før kom i to utgåver og blei nominert til fleire prisar.

Rask nykomar i 2016

Det var ikkje overraskande at den minste båten var den som i volum selte best. Likevel trur Dyrstad at årets nye modell, Askeladden C65 Cruiser, vil bli årets bestseljar.

– Nye båtar sel alltid godt, dessutan trur vi denne kan treffa endå fleire, både i storleik og prisklasse.

C65 er 6,45 meter lang, 2,46 brei og veg 1400 kilo utan motor.

Les òg: – No vil alle ha stor motor

Båten er bygd for 7 passasjerar og motor frå 150 til 250 hestekrefter, og vil med største motor få ein toppfart på rundt 48 knop.

– C65 med 200 hk er berre 150.000 kroner dyrare enn C61 med 150 hk og 200.000 kroner billigare enn C75 med 300 hk.

– Den er meir romsleg enn C61 og vil med største motor topline-pakke gå på tilbodspris for 650.000 kroner.

Lansering på Sotra (!) i februar

Prototypen av Askeladden C65 skal lanserast i siste halvdel av februar.

Båtmessa Dra til sjøs er tilbake til februar månad og under tak igjen etter sju år utandørs ved Vil Vite, der den har vore i brygge og telt og stadig seinare på året.

Messa blir arrangert i nye Sotra Arena i Straume Idrettspark. Sotra Arena, som husar tre handballhallar, er dobbelt så stor som Dra til Sjøs sitt førre, faste messelokale, Arenum, var.

Dra til Sjøs blir i år arrangert frå 18. til 21. februar.

Midtsiden samleside: Askeladden