Dette er ein 99 år gamal buss

Bildeserie:

1 av 12

I morgon er det amcartreff i Os, i helga er det årstreff i Ulsteinvik for Rutebilhistorisk Forening.

– 5 av dei 7-8 køyrbare bussane vi har i lokallaget vårt deltar på treffet, tre av dei frå Os og to frå Åsane, fortel Ole Jonny Dale.

På kvelden 16. mai blei bussane gjort klare for avreise frå ARKA i Industrivegen, to av dei for eiga maskin, den eldste, ein T-Ford, blei tatt på hengar.

– Den er bygd i 1919 og var registrert som buss første gong i 1920. Når du passerer 30 km/t ristar det godt i heile bussen, så det er ikkje praktisk å køyra den til Ulsteinvik.

Tre pedalar - men gass på rattet

T-Ford-bussen har plass til 12 passasjerar, 6 på kvar benk baki kassen.

– Gassen er på rattet, så kan du jo tippa kva dei tre pedalane er til, seier Dale, før han svarer på sitt eige spørsmål.

– Det er éin pedal for revers, éin for brems og éin for framover. Trør du inn bremsen så er det bråstopp, mesteparten av bremsinga tar du ved å skifta frå andre- til førstegir. Det er berre to gir framover, i førstegir går ikkje bilen fortare enn 3-4 km/t.

Bussen blei funnen i ei myr i Fana for over 30 år sidan.

– Ein som heiter Lønningen, som var kontormann i Fana-Os-Milde, berga bussen, ein som heiter Fagerholt dreiv den fram til det den er i dag. Første gong den blei vist på treff var tidleg på 90-talet.

Ein ekte Os-buss frå 1950

Den nest eldste bussen som er med på treffet er ein Bedford frå 1950, bygd som buss nettopp på ARKA.

– Den blei seinare bygd om frå rutebuss til turbuss, og fekk blant anna desse vindauga i taket. Takluka er original, den var gamle Rasmussen (ARKA) og henta frå lageret då bussen blei restaurert.

Også treklubba som kunne brukast til å knusa ruta ved nød er original.

– Men dei einaste seta som er originale er baksetet. Her sit du godt, med armlene og alt.

Dale sin første

Den tredje bussen dei frå Os har med seg er ein Volvo frå 1984.

– Det er den første bussen eg køyrde. Det blei mange turar over Fanafjellet med denne for Fana-Os-Milde, seier Ole Jonny Dale før han og Erling Tveit sa seg nøgde med kveldens klargjeringinnsats og gjekk heim for å førebus seg for 17. maifeiring før pinsetur til Ulsteinvik.

I alt er det 10-12 rutebilentusiastar frå Os som i helga er på årstreffet. Dette er det 30. årstreffet i rekkja, neste år er det treff i Hønefoss.