– Dette skal vi halda fram med!

Med vinden og temperaturen som prega dagen i går, skulle du kanskje ikkje tru at kino på stort lerret i sure 3 pluss ville vera mogleg, eller i det heile trekkja folk.

Men i perfekt le for vindkasta hadde om lag 130 menneske samla seg i Halhjemsmarka for å sjå ein klassisk julefilm saman.

Dobla alt

Ideen om ei sosial hending i enden av av ei julepynta gate dukka opp i fjor, og frå idé til handling, var vegen kort. 

Kent-Eivind Storum, som saman med naboane Atle Hornes og Torodd Bolseth hekla i hop heile arrangementet i går, fortel om stor suksess;

– Alt vart rett og slett dobla, fortel Storum. I fjor var det om lag 70 menneske her, i går om lag 130. I fjor samla vi inn 4000 kroner til barneklinikken, i går fekk vi inn 9250 kroner!

– Konklusjonen er difor enkel; dette vil vi halda fram med, og vi har framleis plass til fleire.

Planlegg allereie neste år

Storum fortel at sjølv om det ikkje vart snø denne gongen, (i fjor lava snøen perfekt ned i timane før filmen), la ikkje dette nokon dempar på steminga.

– Vi går no og syslar litt med tanken på ei snøkanon til neste år. Berre sånn i tilfelle. Uansett har vi veldig lyst til å gjera arranegementet enno større og betre, vi kan liksom ikkje slutta å utfordra oss sjølve.

– Men kva er det som får godt vaksne mannfolk til å klemma inn noko såpass tidkrevjande no rett før jul? Dei fleste har jo meir enn nok med å bli klare til jul på vanleg vis?

– Eg må skulda på kona mi, Helene, kjem det kjapt frå Storum. Det er hennar feil alt saman. Ho kom med ideen, vi berre hang oss på. 

– Men spøk til sides; vi er er ein gjeng gode naboar som trivs godt i lag. Å køyra ein open invitasjon til å koma og sjå på film hos oss fell oss naturleg. Einaste haka ved invitasjonen er at du må sjå filmen i vegen vår, humrar Storum. Med litt hjelp frå gode sponsorar i tillegg er dette faktisk berre kjekt å stella i stand. 

Innimellom oppryddinga etter gårsdagens suksess skal arrangørane no kontakta Barneklinikken på Haukeland for å høyra kva dei treng av leikar.

Når lista er klar skal det handlast leiker for kvar einaste innsamla krone. Til slutt går turen til Haukeland for å levera gåvene. Dette skal det kreative nabolaget på Halhjem sjølvsagt rekka før jul.