Dialog rundt Ulvenvatnet

Fredag 26. april satte representantar frå Forsvarsbygg, Ulven Leir og Heimevernet seg saman med representantar frå Os kommune for å drøfte moglegheiten for å få til ein permanent tursti rundt Ulvenvatnet. Møtet kom i stand etter at den politiske leiinga i Forsvarsdepartementet hadde bedt partane koma fram til ei omforeint løysing.

– Vi fekk jo tommelen ned då vi hadde turstien oppe i samband med arealplanen, så at forsvarsbygg no tok eit initiativ til møte er positivt.

– Eg trur vi skal gje Lars Atle Skorpen i arbeiderpartiet, honnør for å ha nytta sine politiske kontakter inn i regjeringsapparatet for å setja temaet på dagsorden, fortel ordførar Terje Søviknes (Frp).

Fastlåst, men...

Utfordringa med etablering av turstien er mogleg konflikt mellom forsvaret sine øvingsaktivitetar og publikums ferdsel. I møtereferatet kjem det fram at heimevernet nyttar Ulven leir til øving mest heile året, og at ein turveg berre vil kunne nyttast fritt nokre få dagar i året.

Det er spesielt området i nordenden av vatnet, ved Brandsneset, kor utfordringane er store.

– VI kom ikkje til ei løysing i møtet, men blei einige i å ta ei synfaring.

– Eg er nøktern i høve til å få til ei løysing, men vi jobbar med det.

– Berre det at saka no er løfta opp igjen er positivt, slår ordførar Terje Søviknes fast.

Ut frå møtereferatet kan det sjå ut som ei løysing med sti frå Moberg til Haggardvika og så ei rundløype tilbake kan vera den løysningen som ligg nærast.