Doblar midla til lokal trafikktryggleik

I fjor delte samferdselsdepartementet ut 4 millionar kroner til ulike trafikksikringstiltak, som fartsdumper på skuleveg, i eit bustadfelt, lys i fotgjengarfelt, trygging av treningsfelt og ulike trafikksikringskampanjar.

– Lokalt trafikksikringsarbeid er ein svært viktig del av arbeidet med å auke trafikktryggleiken.

– Samferdselsdepartementet deler i år ut åtte millionar kroner til lokale tiltak, seier samferdselsminister Ketil Solvik-Olsen i ei pressemelding.

Oppmodar lokale om å søka

Tilskuddsordninga, som har søknadsfrist 1. mai, skal bidra til å styrka lokalt trafikktryggleiksarbeid i regi av frivillige organisasjonar, interessegrupper, kommunar og andre lokale aktørar.

– I arbeidet mot drepte og skadde i trafikken er det viktig å jobba saman, og lokale initiativ er viktige bidrag. Eg oppfordrar alle som har eit godt lokalt prosjekt som kan gjera trafikk-kvardagen tryggare om å søka, seier Solvik-Olsen.

Som ein hovudregel er øvre grense for tildeling av tilskot 500 000 kroner. I vurderingane av søknadane blir desse tinga vektlagt:

• Om tiltak vil bidra til det nasjonale målet om reduksjon av talet på drepte og hardt skadde i trafikken.
• Dei som søkjer må ha kunnskap om lokale trafikktryggleiksutfordringar og -behov, og forståelse for kva målgruppe, eller ulykkestyper tiltaket rettar seg mot.
• Det blir lagt vekt på om prosjektet baserar seg på samordna innsats frå fleire aktørar.
• Tiltak retta mot barn og ungdom blir prioritert, samt prosjekt som stimulerer til stor grad av eigenaktivitet og frivillig arbeid.

Minstekrav til søknaden finn du på samferdselsdepartementet si heimeside.