Arne Veim Haugland under VM laurdag kveld. (Privat bilde, foto: Kenneth Døsen Moen)

Dødsbra av Arne!

Arne Veim Haugland tok VM-sølv i dødsing. – Eg var nær på å mista finaleplassen, seier den uredde osingen.

Av: Kjetil Vasby Bruarøy

Etter delt 5. plass og 4. plass dei siste åra var osingen Arne Veim Haugland ein av ti førehandskvalifiserte til årets VM i dødsing i Frognerbadet.

I tillegg kjempa 60 utøvarar om dei resterande 20 plassane i VM, som gjekk av stabelen laurdag kveld.

– Det blei tre stup på kvar, ein kvartfinale og ein semifinale, der summen av dei to blei lagt saman for å bestemma kven som fekk ein av dei ti finaleplassane, forklarer Arne.

I kvartfinalen er det klassisk dødsing som gjeld, ingen flip eller andre triks.

– Eg satsa på høgde og fart og gjorde det bra, men i semifinalen gjekk det ikkje fullt like fint. Der tok eg ein molberger til døds (molberger er når du spring framlengs ut frå kanten og kastar deg i ein backflip). Eg fullførte, men berga finaleplassen med berre eitt poeng.

Russisk sjølvmord

Sup & Stup i Mandal kunne vore eit godt oppvarmingsstemne til VM, men då denne dødsekonkurransen blei arrangert var Arne gjest i eit bryllaup.

– Det har faktisk ikkje blitt nokre konkurransar på meg tidlegare i år. Men eg har fått god trening i Ado Arena, som også er sponsor for meg.

Når den dristige osingen er påkledd jobbar han med å selja hus i Bergen og Os. Før VM hadde eigedomsmeklaren ferie på Kypros. 

– Både på Kypros og her i Os er det nokre klipper som er fine å trena frå.

I finalen gjekk Arne for «russian suicide», eit stup der du legg deg på rygg i lufta og held posisjonen lengst mogleg før du snur deg over på mage og går inn i rekeformasjon.

– Det blei ganske bra. Eg kunne nok ha halde ryggposisjonen endå litt lengre, men eg ville nok uansett ikkje klart å ta førsteplassen.

Vinnaren blei, som i 2014 og 2013, den profesjonelle stuparen Filip Julius Devor, også han frå Noreg.

– Dei siste stega er verst

Atleten Arne er glad i både ski, snowboard, fotball og handball, like uredd i alle idrettar.

– Men eg har sug i magen når eg går opp trappene til 10-meteren, og det blir verre og verre dess nærmare toppen eg kjem. Dei siste trinna er verst, innrømmer han.

– På toppen er frykten vekke, då er det berre gøy, seier Arne, nøgd med andreplassen og etter-døds-festen på utestaden Vu i Oslo laurdag kveld.

– Kva er det verste som kan skje?

– Du kan knekka ribbein, punktere ei lunge, skade milten eller skade nasa. Du kjenner at du landar, og det har hendt at eg har møtt vatnet med beine for langt frå kvarandre eller fått lufta slått ut av meg. Men eg har aldri blirr alvorleg skadd.

Arne hadde kameraten Kenneth Døsen Moen med til Oslo som bakkemannskap og mentor.

VM på video

Dødsing, som blei «oppfunnen» i Frognerbadet i 1972, går ut på å kasta seg ut frå 10-meteren, som om du skal ta mageplask, for så å krølla saman kroppen som ei reke kortast mogleg tid før du treff vatnet.

På VG.no kan du lesa meir om bakgrunnen for dødsing - og sjå video frå gårsdagens VM.

Her kan du sjå heile VM, Arne sine hopp kjem på 1:06:10, 1:41:55 og 2:08:30.

Her kan du sjå dødsing i Osbadet som kvalifisering til VM i 2013.

Fleire saker