Dødsklar for VM

I desember arrangerte Arne Veim Haugland det første Osmeisterskapet i dødsing i Osbadet. Vinnaren blei kvalifisert direkte til kvartfinalen i VM, som blir arrangert i Frognerbadet laurdag 17. august.

Arne var ikkje verre enn at han tok heim sigeren sjølv, og dermed fekk VM-billetten.

Sjå bileter og video frå Osmeisterskapet her.

– No er eg klar. Det skal bli utruleg kult, sier Arne før avreise til Oslo.

Torsdag gjorde han dei siste førebuingane frå ei omlag 9 meter høg klippe like innanfor Blindasundet mot Hauglandssjøen.

Går for tre hopp

Sidan Arne allereie er kvalifisert blant dei 30 som får hoppa kvartfinalen slepp han å gå via kvalifiseringa Frognerbadet.

– I kvartfinalen er det 30 stykkar som skal utføra eit klassisk døds.

– Det vil seie, høgst mogleg fart ut frå tårnet, komma lengs mogleg ut og berre ligga flyta ned mot vatnet før du knekk saman, forklarar 22-åringen.

I semifinalen skal deltakarane hoppa fristil, før finalen er valfri om dei går for eit klassisk hopp, eller vil gjera nokre sprell i lufta.

– I semien satsar eg på ein variant av ein molberger (strak baklengs salto, journ.mrk) med ei tvist, seier ein sjølvsikker Haugland, som ikkje reiser til Oslo for berre å hoppe eitt hopp.

VM-tittel, Bruno-pris og våghals

I tillegg til VM-tittelen kjempar deltakarane om Bruno-prisen for beste klassiske døds (Oppkalla etter gitarist Erling Bruno Hovden, kjent frå legendariske Raga Rockers).

– Han var ei legende i Frognerbadet. Når han hoppa stoppa alt opp og alle følgde med.

– Bruno hadde ein helt eigen stil kor han løp ut i lufta, opna opp når han kom til tre-meteren før han klappa saman, forklarar våghalsen frå Os.

Arrangørane i det internasjonale dødseforbundet delar òg ut prisen til VMs våghals.

– Kvifor gjer du dette?

– Fordi det er gøy.

– Eg er jo avhengig av adrenalin. Den spenninga du får i kroppen når du flyt ned mot vatnet og ikkje veit om du klarar å klappa saman før du treff vatnet er ubeskriveleg, avsluttar Arne Veim Haugland.

Dette er dødsing

Forfattar Roy Jacobsen er truleg den som har beskrive dødsing best, då han omtala fenomentet i sukessromanen Seiersherrane i 1990.

"Dødsstup med løpefart - ettbeinssats, flatt ut i ingenting, så langt ut som mulig, vannrett, arma oppover og bakover som finnene på en Buick-55, beina oppover, magan først, en jevn bue fra ytterste fingerspiss til ytterste tåspiss, ei hengekøye, med det sårbare bukskinnet i peak, før du klapper sammen så nær vannflata at de som står lamslått rundt bassengkanten - og det er mange - ikke har sett om du rakk det eller ikke - kaboff! - så spruten står helt opp til brøstet til kompisen som venter på brettet."

Video, 0:49: Sjå Arne Veim Haugland i dei tre siste hoppa før avreise til VM (foto: Andris Hamre/Midtsiden.no)