Dømd for beføling

I Bergen tingrett førre veke blei ein mann som jobba i helsebransjen, med praksis i Os, dømd for å ha skaffa seg seksuell omgang ved misbruk av stillinga si.

I tillegg var mannen tiltalt for, "under særdeles skjerpande omstendigheter" å ha foretatt seksuell handing mot nokon som ikkje hadde samtykka til det.

Mannen skal ha befølt kvinnene på brys og på kjønnsorgan. Kvinnene skal ha blitt redde, og turde ikkje å gjera motstand.

Dei to episodane skal ha skjedd på ein klinikk i Bergen i 2011 og på kontoret hans på Os i 2010.

Dei to kvinnene var begge i midten av 20-åra og samtykkja ikkje til den «utvida» behandlinga.

I tingretten blei det i tillegg ført eit vitne til som hadde meinte ho hadde blitt utsett for upassande behandling frå mannen tilbake i 2005/2006. Dette forholdet blei ikkje meld til politiet, men fornærma stilte som vitne.

Trudde kvinnene

Retten meinte at forklaringa frå dei tre kvinnene framsto som truverdige, og at det ikkje er grunn til å tvila på at dei har følt seg krenka og utilpass under tiltalte si behandling. Vidare skriv retten at dei finn at det er eit sterkt bevis i saka at det er tre kvinner som alle har opplevd det dei meiner er ei behandling i intimsonen som ikkje har vore medisinsk adekvat.

Tiltalte forklarte seg òg for retten, som legg til grunn at det var ei rekkje uovereinsstemmelsar mellom dei fornærma sine forklaringar og tiltalte si forklaring kva gjeld dei faktiske forholda.

Avslutta pasientforholdet

Retten fann det påfallande at mannen hadde blitt meldt for seksuelle krenkingar av to kvinner og at ytterlegare ei tredje kvinne har reagert negativt på hans tilnærmingar under behandling.

Alle tre kvinnene avslutta sine pasientforhold til mannen etter dei aktuelle episodene.

I straffeutmålinga la retten til grunn at tiltalte tidlegare var ustraffa, men at den ikkje fann nokre formildande omstende i saka. I straffeskjerpande retning la retten vekt på at mannen hadde opparbeidd eit tillitsforhold til pasientane som han brukte til å skaffe seg den seksuelle kontakten.

Mannen blei dømd til 9 månader fengsel, kor 90 dagar blei gjort betinga med ei prøvetid på to år. I tillegg blei han dømd til å betala erstatning på 50 000 kroner til ei av kvinnene, samt sakskostnader med 6 000 kroner.

Om mannen mistar retten til å praktisera som kiropraktor overlet retten til Helsetilsynet å avgjera.