Dømt for vald på bussjåfør

Det var like før jul i 2014, at ein passasjer på 600-bussen til Bergen gjekk til angrep på bussjåføren med det resultat at bussen hamna i autovernet på E39 rett ved Røykenes.

Ein 42 år gamal mann frå Os sto i førre veke tiltalt for forholdet i Nordhordland Tingrett.

I retten kom det fram at mannen hadde laga bråk og kvalm på bussen og blitt beden om å gå av. Han skal ha vore rusa på narkotika, stor i kjeften og til sjenase for både passasjerar og sjåføren skriv BA.no

Opplevde slaget ulikt

Mannen erkjente i tingretten straffeskyld, men sa han fekk panikkangst då han blei trua med å gå av bussen. Sjølv meinte han at han berre var så vidt borti skuldra på bussjåføren, noko vitne hadde ei anna oppleving av.

I følgje BA.no opplevde både passasjerer og bussjåføren at slaget var hardt og målretta mot tinninga til bussjåføren.

– Eg blei heilt slått ut, og det neste eg hugsar er at bussen står i autovernet, fortalde sjåføren i retten.

42-åringen, som er tidlegare dømd for fleire lovbrot ba om samfunnstraff, men retten dømde han til ubetinga fengsel i eitt halvt år. I dommen karakteriserar retten valden som uprovosert og at handlinga fort kunne fått svært alvorlege konsekvensar.