På sitt andre makrell-fiske fekk lærling Mathias Dale (19) oppleva å ta 680 tonn makrell - i éi not. (Foto: Kjetil Osablod Grønvigh) 

– Dritgøy å få oppleva

19 år gamle Mathias Dale frå Nore Neset var med på rekordfangsten til MS Røttingøy - i dag kom dei heim. 

image
image
image
Av: Kjetil Osablod Grønvigh

– Dette er, med god margin, prisrekord for Røttingøy på éin enkelt fangst.

Det sa dagleg leiar i Dales Rederi, Astrid Dale, då nyheita om fangsten vart kjend i førre veke.

• Les òg: Rekordfangst av MS Røttingøy

– Eg er stolt og glad på mannskapen sine vegne, det er sånt du gjerne berre får oppleva ein eller to gongar i løpet av eit liv som fiskar, sa Dale.

Rekordfangsten på 680 tonn makrell vart gjort i EU-sona utanfor Shetland. 

Klinka til på fiske nummer to

Mathias Dale frå Nore Neset har vore lærling om bord på MS Røttingøy i to år. Han har vore med på makrell-fiske ein gong før.

– Du veit det er inspirerande å få oppleva noko slikt så tidleg i karriera di, seier ein tydeleg stolt Dale. 

– Stemninga stod jo først i taket då vi fann ut at vi hadde henta opp 680 tonn, og stemninga heldt fram då vi fann ut at vi fekk svært god pris på fangsten.

– Dette var rett og slett dritgøy å vera med på!

Blomar og sjokolade til mannskapet

I dag la MS Røttingøy til kai i Gjelevika på Røtinga. 

På plass for å møta båt og mannskap var sjølvsagt Astrid Dale. Ho hadde med seg blomar og sjokolade til mannskapet.

– No skal vi ha lunsj saman, og så står det att litt reingjering av båten før vi sender mannskapen heim. 

Dale fortel at det ikkje er heilt sikkert kor tid MS Røttingøy skal ut att.

– No sit vi og ventar litt på korleis det utviklar seg i Norskehavet, men mannskapen held seg klare om vi brått veljer å gå ut att. 

– Nei, noko Syden-ferie kan ikkje karane dra på nett no, men vi har gode ordningar på korleis vi heile tida har eitt komplett mannskap klart. 

– Det var noko med den flekken

Skippar på rekord-turen var Olav Dale. 

Dale fortel at ein stim på sonaren vert kalla ein «flekk», og då dei såg rekord-stimen på sonaren, vurderte mannskapen den først til 400-500 tonn med fisk.

– Det var noko med den «flekken», og vi valde å gå for den.

At «flekken» pumpa om bord til slutt vog 680 tonn- og full båt, var ei spesiell oppleving fortel Dale.

Nokre timar seinare var det klart at fisken var seld til 17 kroner kiloen, noko som er å rekna som ein svært god pris. 

– Det var ei spesiell oppleving å gå til Ålesund med ei så dyr last om bord, det skal eg innrømma, men til sjuande og sist handlar jo dette om gleda over å få vera ute på havet å fiska, avsluttar Dale.  

 

 

 

 

Fleire saker