E39: Her er vedtaket

Vedtak Os kommunestyre 05.02.13:
Pkt. 1-4 vedtatt med 20 røyster (2AP, 13 FrP, 5 H) mot 15 røyster for indre trase (2KrF, 2V, 1SP, 4 TVS, 1H, 5AP)
Pkt. 4 vedtatt med 25 røyster (7AP, 13FrP, 5H)
Pkt. 6 vedtatt med 29 røyster (7AP, 13FrP, 5H, 2KrF, 2V)

Les òg: Kommunestyremøtet - minutt for minutt

Os kommunestyre viser til dokumenta KVU E39 Aksdal-Bergen, KS1 E39 Aksdal-Bergen og Tilleggsutgreiing til KVU E39 Aksdal-Bergen. Os kommunestyre meiner at Tilleggsutgreiinga burde vore på formell høyring før endeleg handsaming hos nasjonale styresmakter.

Med bakgrunn i Tilleggsutgreiinga til KVU E39 Aksdal-Bergen vedtek Os kommunestyre følgjande ny uttale i saka; 

1. Ferjefri E39 er eit nasjonalt prosjekt med mål om å korta ned reisetida og binda saman bu- og arbeidsregionane nord-sør langs Vestlandet. Grunna store lokale og regionale frilufts-, natur- og kulturlandskapsverdiar kan Os kommune ikkje på noko tidspunkt akseptera ilandføring av ei eventuell bru i området Søre Øyane. Os kommune føreset vidare, med bakgrunn i rapportane, at ferjefri E39 uansett indre eller midtre konsept skal koplast på kommande E39 Os-Bergen i Svegatjørn/Endelausemarka.

Os kommune er uroa over dei mange usikre momenta i rapportane frå Statens vegvesen i høve endeleg traseval og ilandføringspunkt i Os kommune for begge konsepta K5B indre trase og 4C midtre trase.

2.Os kommune vil leggja følgjande føringar for dei to konsepta;

Konsept 4C, midtre:

-ilandføring av bru i Os skal ikkje skje i Søre Øyane/Røttingen og via øyane innanfor, men leggjast til Halhjem/Bjørnatrynet og vegen førast vidare i tunell mot Moberg/Svegatjørn

-Os kommune kan ikkje akseptera at regionale frilufts- og naturverdiar i skjergarden i Søre Øyane vert råka

-Nærmiljøet langs eksisterande E39 Halhjem-Moberg må skjermast ved at ny firefelt motorveg vert lagt i tunnell på denne strekninga

-Friluftsinteresser, natur, landskap og estetiske verdiar må vektleggjast ved linjeval og utforming av flytebru/tunellpåslag

-Det bør byggjast nye tverrsamband til Austevoll og Fusa som ein del av hovudprosjektet. Tverrsambandet Os-Fusa bør også sikre at trafikk aust ifrå vert lagt utanom kommunesenteret Osøyro.

-Alle som vert direkte råka av ei eventuell utbygging må få kompensasjon for tap av eigedom/verdiar etter marknadsprinsipp.

Konsept K5B, indre:

-E39 må førast inn i Os kommune, og koplast til kommande E39 Os-Bergen i Svegatjørn/Endelausemarka.

-Friluftsinteresser, natur, landskap og estetiske verdiar må vektleggjast ved linjeval og utforming av veglekamen/bruer på parsellen Eikelandsosen-Endelausemarka/Svegatjørn. Viadukt og miljøtunellar må nyttast der dette skjermar nærmiljøet. Omsynet til naturverdiar i Oselvvassdraget må vega tungt.

-Lokaltrafikk frå austre delar av Os kommune kunne kopla seg på E39 aust for Oselva for å redusera trafikken gjennom kommunesenteret Osøyro.

-Alle som vert direkte råka av ei eventuell utbygging må få kompensasjon for tap av eigedom/verdiar etter marknadsprinsipp.

3.Os kommune ynskjer brei lokal medverknad i det vidare planarbeidet, også om planarbeidet vert vidareført som ein statleg plan etter Plan- og bygningslova.

4.Uavhengig av vidare arbeid med Ferjefri E39 og KVU E39 Aksdal-Bergen må NTP 2014-23 sikra fullfinansiering av E39 Svegatjørn-Rådal slik at dette prosjektet kan realiserast i perioden 2014-19.

5.Os kommune er i sterk vekst. Av omsyn til arealdisponeringa på kort og lang sikt, er det viktig snarast å få fastlagt kor E30 skal gå mellom Fusa eller Reksten og Endelausemarka/Svegatjørn.

6.I Statens vegvesen si tilleggsutgreiing side 7 er det sagt; «I arbeidet med KVU kom spørsmålet om å gå direkte vidare nordover mot Arna opp. Går ein vidare med planlegging av det indre alternativet gjennom Fusa vil spørsmålet komme opp att, og det kan vurderast saman med andre alternativ i ein KDP/KU-prosess».

Etter Os kommune sitt syn er dette eit anna konsept enn dei som tidlegare er vurdert. Dette alternativet kan Os kommunestyre ikkje tilrå. Etter Os kommunestyre si meining er konsept K5A med bru over Fusafjorden i prinsippet det same som konsept K5B. Dette konseptet kan kanskje bli betre for Os kommune, og for indre korridor totalt. Dette konseptet bør derfor også vurderast i den vidare planlegginga.