Effektiv hjortejakt i Nordstrøno

Nokre minutt ut i sesongen gjekk dei første to dyra i bakken, ei veke seinare er heile kvoten tatt.

Bjørn «Bosse» Sigurjonsson med ein 14-taggar han skaut i Nordstrøno for rundt seks år sidan. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøylørdag 10. sep. 2016 08:17

– Det gjeld å gjera seg ferdig før hummarfisket startar, seier Bjørn «Bosse» Sigurjonsson og ler.

Saman med Kjell Erik Nordstrønen og Roald Reiertsen var han onsdag kveld, ei veke etter at jakta starta, ferdig med årets sesong.

Jaktlaget er ikkje blant dei som drøyer jakta mot jul for å ha unnskyldning til å ta seg ein gutetur på hytta. Fire av fire dyr er felt, dei to første gjekk i bakken nokre minutt over klokka seks om morgonen 1. september.

Dyra er felt ikkje så langt frå stoveglaset heime hos Bosse, huset som ligg høgast over fjorden av bustadane på øya der sola skin lengst i Os.

– Vi har bygd oss ei lita bu nede på bakkane her. Vi driv både smygjakt, sit på post og jagar. Kolla og kalven skaut vi på veg ut i terrenget første morgon, den siste bukken blei felt onsdag kveld.

– Ei oppgåve som forpliktar

I fjor var kvoten på fem dyr, også då blei fem av fem felt av det vesle jaktlaget.

– Når du har ein kvote så forpliktar det, jakt handlar om forvalting av bestanden.

– Det var ikkje snakk om å spara eit dyr til seinare, for å kosa seg med jakta nokre veker til?

– Normalt ønskjer vi å fella bukken først, før brunsten, når den mister vekt og byrjar å lukta. Kalven kan vera greit å ta sist, så den legg på seg nokre kilo, og kolla tar du uansett etter kalven, så det ikkje er fare for at kalven stikk av og blir gåande åleine.

Handplukka utval

Jaktlaget førebur seg godt til jakta, ikkje for å ta kvoten raskast mogleg, men for å fella dei rette dyra.

– Det er fleire vi slepp forbi enn dei vi feller, dei største dyra får gå. For oss handlar det ikkje berre om å fylla frysen med godt kjøt, med gode avlsdyr kan det bli fødd større kalvar som klarer seg betre.

Likevel heng det både 12-taggarar og ein 14-taggar på veggen heime hos Bjørn, også denne felt i Strøno.

– Han hadde blitt ein «heimahjort», ein som kom tett på folk, som sto og stampa i bakken utanfor husa når familiar på Strøno skulle ut. Vi blei beden om å ta denne, i tillegg hadde han noko garn fast i geviret.

Har hjorten «rømt» frå Endelausmarka?

Sigurjonsson seier fleire jaktlag fortel om mykje hjort i terrenget i år.

Han undrast om årsaka kan vera bygginga av E39 Svegatjørn-Rådal.

– Endelausmarka var jo eit stort og fredeleg område for hjorten. Når det no er høg aktivitet i området er det jo mogleg at han trekk seg unna og det blir meir å sjå andre stadar i Os.

Uansett er jakta over for Bosse og resten av Nordstrøno jaktlag.

– No er det berre å gjera seg klar for hummarfisket, seier Bosse, klar for meir kortreist delikatesse.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.