– Eg blei heilt sjokkert
Laurdag kveld klokka 21.30, i Stavanger Konserthus, blei Gina Aspenes med debutalbumet Inertia ropt opp som vinnar av Spellemannsprisen 2013 for beste bluesalbum.
– Eg blei heilt sjokkert! Eg er nøgd med plata mi, men i konkurranse med to så erfarne og dyktige karar var eg ikkje førebudd på å stikka av med prisen. No er eg stolt og audmjuk.
– Eg sat klar til å klappa for ein av dei andre og blei veldig overraska då namnet mitt blei lest opp, seier Gina til Midtsiden.no.
Dei to andre nominerte var Bjørn Berge med "Mad Fingers Ball" og Knut Reiersrud med "Aftonblues".
Takkar Os Rock City
Spellemannsshowet blei sendt direkte på NRK1, og då Gina gjekk opp for å ta imot prisen såg det ut som om ho slo eit venleg slag i skuldra til sambuar Thomas Moberg Hansen.
– Slo eg han? seier Gina og ler, før ho roper til Thomas for å sjekka påstanden frå Midtsiden.
– Eg trur eg utbraut noko sånt som; jaggu vant eg, og skulta i han, ler ho.
Etter den fine takketalen, der produsent Ole Reinert Berg-Olsen, trommis og medhjelpar i USA, Erick Jaskowiak, sambuaren og mamma Herdis blei nemt, har prisvinnaren fleire ho vil takka.
– Alle som har vore med på plata, alle musikarane, og, ikkje minst, alle osingane. Tusen takk Os Rock City, og alle de som har trudd på meg, alltid.
Helsing frå Knut og Terje
Gina fortel om mange fine helsingar, og éi ho sette spesielt stor pris på.
– Knut Reiersrud, som tydelegvis har eit radioprogram, sa at han har spelt plata mi mykje. Han kom med skryt og sa at han synest prisen var fortent.
Også ordførar i Os, Terje Søviknes, kjem med gratulasjonar.
– Det er heilt fantastisk med Spellemannspris for debutalbumet! seier Søviknes.
– Inertia er eit strålande album med mange høgdepunkt! Gina har jobba hardt, og det gjev resultat. På vegne av hele Os kommune vil jeg gratulere Gina med ein fantastisk bragd - vi er stolte osingar i kveld!
Søviknes kjem også med gratulasjonar til Ole Reiner Berg-Olsen, som både har vore pådrivar for å få Gina til å gå i studio, deltatt med tekstskriving og produsert albumet.
– Berre til å kjøra på
Gina seier Spellemannsprisen betyr mykje for ho.
– Dette var utruleg gledeleg og veldig inspirerande.
– Eg har snakka med manageren min, Nils Magne, i kveld, og no vil vi berre kjøra på.
– Det er berre til å jobba på med neste plate.
Gina reiste til Stavanger med blant andre sambuaren Thomas og mamma Herdis. Produsent Ole, som nyleg har blitt pappa igjen, var representert ved sin sambuar, Kari Kvæven.
Reisefølgjet frå Os var ikkje blant dei mange som ikkje kom seg fram til showet i uværet.
– Vi fekk eit hint om det stengte ferjesambandet og tok heldigvis ein annan veg då vi reiste ned fredag, fortel Gina Aspenes, som verken gjekk glipp av pristildeling eller festen.