- Eg kan betre

Torsdag 9. september fekk vi sjå osingen Richard Myhre Gåssand (17) få heile salen med seg då han var på X-Factor-audition i Forum på Danmarksplass.

Richard gjekk vidare frå første runde, som blei spelt inn i mai, og var blant dei 100 deltakarane som møtte opp i Oslo helga 6. til 8. august for neste opptak.

• Les òg: – For eit publikum!

Dette blei vist fredag kveld, utan at vi fekk sjå noko til Richard, som ikkje var blant dei 24 som gjekk vidare. Men han var med etter første sortering, der halvparten blei sendt heim.

- Eg song ei låt av norske Jørn Lande som heiter «Duke of Love». Lande er blant anna kjent for låta «Alt for Norge», fortel Gåssand.

- Framføringa er eg ganske nøgd med, men samstundes veit eg at eg kunne gjort det betre. Det var ikkje så ille å ryka ut likevel, eit år med øving kan vera greit det no.

- Så det kan bli aktuelt å melda seg på igjen i 2011 eller seinare, om det blir fleire sesongar?

- Planen er å satsa på musikk og det kan godt henda at eg stiller opp i X-Factor eller liknande komkurranse seinare, seier Richard, som har Heidi Tronsmo frå Opera Omnia som songpedagog.