– Eg kan gå betre i morgon

Bildeserie:

1 av 6

Fredag starta verdscupen i Stavanger og i 18-tida var det duka for 1500-meteren med ein og ein halv osing, Sverre Lunde Pedersen og Sindre Henriksen frå Fana IL.

– Eg har vore sjuk sidan måndag, lagt i senga med feber og ikkje vore på isen før no. Men eg kunne ikkje lata vera å stilla på heimebane, seier Sindre Henriksen til Midtsiden etter løpet.

Henriksen gjekk på 1.50,15 og droppa 5000-meteren i morgon.

Mykje publikum frå Os

Midtsiden har saman med Travelnet Os Reisebyrå sett opp supportar-tur til Stavanger og dei 21 om bord i bussen kom seg med siste ferja over Boknafjorden før sambandet blei stengt.

Følg Midtsiden på Instagram for bilde og videoar frå turen.

På ferja og i Stavanger har vi møtt endå fleire osingar, til saman er vi godt over 50 i Sør Arena, og dei var klare for å sjå Sverre på pallen i dag.

Men Lunde Pedersen fekk ikkje full klaff og landa med 1.46,98 på 9. plass i par med Bart Swings, som sette ny banerekord på 1.45,88. Rekorden blei stpande til Denis Yuskov tok 1. plassen på 1.44,94.

Håvard Bøkko blei beste norske på 7. plass med tida 1.46,80.

– Formen kjennest grei

Etter at Sverre droppa EM grunna sjukdom kom han sterkt tilbake i NM. I dag gjekk han ikkje like fort.

– Eg fann aldri flyten så då blir du òg sliten, seier Sverre.

– Fysisk sett er formen fin igjen, og i det siste har eg vore betre på 5000 enn på 1500, så eg kan klara meg betre i morgon, seier Lunde Pedersen til Midtsiden på veg til garderoben.

NRK1 sender direkte frå verdscupen. Sendinga laurdag startar klokka 14.25.

Midtsiden er i Stavanger heile helga, også når Sverre går 1000 meter søndag.