Flavia Robalo saman med kjøpar Ole Viggo Skaathun, som har kjøpt før, og som alltid er blant dei som får velja først. (Foto: Kjetil Vasby Bruarøy)

– Eg plar få viljen min

Ole Viggo Skaathun fekk velja nest først under dagens avslutting av årets skulptursymposium i Os.

image
image
image
image
image
image
image
image
image
image
image
image
image
image
image
image
Av: Kjetil Vasby Bruarøy

I tolv dagar har tolv kunstnarar, seks av dei for første gong, forma skulpturar i tre, granitt, kleberstein og marmor i Vognhallen.

• Les òg: Kunstnerisk diversitet og integritet

Skulpturane er selte i god tid på førehand, men ingen visste kva dei fekk før i dag. Sånn har det vore sidan starten for 20 år sidan.

Varo hylla varmen i Os

Mange kom for å sjå skulpturane og flgja dagens trekning i Vognhallen i dag. Arne Mæland frå Os Kulturutvikling takka kunstnarane og kjøparane, ordførar Terje Søviknes takka initiativtakarane.

– Det har vore regn og sol, jobb og fest, og mange nye venskap i løpet av desse to tiåra. I dag kan du vandra rundt i Os og sjå nesten hundre ulike skulpturar. Det gjer noko med eit samfunn, sa ordføraren.

Kunstnar Marton Varo frå Ungarn er ein av dei som òg deltok i det første symposiet, tilbake i 1999.

– Du kan seia mykje om klimaet i Noreg, men eg opplever berre mykje varme, frå samfunnet som fører til at dette arrangementet kan gjennomførast til frukosten vi kunstnarane får hos vertsfamiliane vi bur oss. 

Dei som fekk velja først

Frå eit fat fekk kultursjef Lisbeth Axelsen trekka Kinder-egg. Sjokoladen hadde Arne ete tidlegare på dagen, men i den gule plastkula låg namn på kjøparane.

Blænes Bygg frå Austevoll fekk velja først, men hadde ingen representantar i Vognhallen. 

– Dei har mange store skulpturar frå før, eg tenkjer at dei kanskje vil ha ein mindre i år, sa Mæland, og valte på vegne av kjøpar ein skultur av Boutros Romhein frå Syria.

Romhein er einaste som har deltatt på alle symposia.

Neste ut var ein som Mæland meiner er «fødd med gullhår i rævo», Ole Viggo Skaathun frå Skaathun Bilverksted. Han har kjøpt tre-fire gongar før, og stort sett fått velja først eller tidleg.

– Eg plar få det som eg vil. No har vi ein del marmor, så denne gong blir det ein av dei mange fine i tre, seier Ole Viggo, som valte seg ein av Flavia Robalo (Argentina) sine skulpturar.

Fusa kommune var ikkje på plass, der var det Os og Fusa-ekteparet Stabell som tok eit val. Den fjerde som fekk velja er ein av dei mest robuste støttespelarane til kulturlivet i Os. Os Næringspark ved Espen Aspenes fekk mykje for pengane, chilenske Marcela Romagnoli sin kvartett i ulike materiale.

– Det er ikkje bestemt kvar dei skal stå enno, men eg tenkjer det kanskje passar bra å plassera dei i Brugata, seier Espen.

Også Søviknes, som på vegne av Os kommune var niande kjøpar som fekk velja, fekk den han ønskte mest.

– Eg synest det er ei spennande form og ein robust og anvendeleg skulptur, sa Terje, som seinast i går snakka med kunstnaren, Petre Mogosanu (Romania).

Eit tempel for alle

Den tiande var Nils Asbjørn Telle frå Sotra.

– Eg bur ved Heganeset, der vi har ein fin skulpturpark, som Arne Mæland lagde første skulptur til («Kystkvinnene»). Eg hadde tenkt å ta ein stor ein, sidan det er litt ungar i parken, men vi får finna ein måte å verna denne på, seier Telle om Gissella Garcia (Uruguay) sin detaljrike skulptur med Tor omkransa av Midgardsormen, og med ein hand med stein frå alle dei andre av årets skulpturar.

Ekteparet Hodneland valte Isao Sugiyama frå Japan sin skulptur i marmor.

– Skulpturen forestiller eit tempel for kva som helst religion. Ein heilag plass for alle, seier Isao.

Ein av dei største skulpturane, Rune Hjermann frå Os sin kleberstein av Lyse kloster, var eit bestillingsverk. Midtsiden kjem tilbake med meir om denne i eiga sak.

6 av 12 var nye 

I alt har om lag 60 kunstnarar laga rundt 85 skulpturar i løpet av dei 10 første symposia.

Desse kunstnarane har deltatt under årets symposium:
Anne Karin Krogevoll (Noreg)
Rune Hjermann (Noreg)
Boutros Romhein (Syria)
Elena Saracino (Italia)
Petre Mogosanu (Romania)
Marton Varo (Ungarn)
Naguib Moein (Egypt)
Gissella Garcia (Uruguay)
Flavia Robalo (Argentina)
Marcela Romagnoli (Chile)
Isao Sugiyama (Japan)
Jacob Cartwright (Australia)

6 av 12 har ikkje deltatt på symposiumet før; Anne Karin, Rune, Elena, Gisela, Flavia og Jacob.

Nytt symposium om ein liten månad

Frå 29. juli til 4. august er nok eit symposium, men desse skulpturane kjem ikkje for sal.

– GC Rieber Fondene har kjøpt alle, og skal gi dei vekk til ulike organisasjonar, fortel Mæland.

Her er det ikkje marmor, tre eller kva som helst granitt, men rullestein frå Jæren som skal brukast.

– Det er ikkje stein frå fjøra, men frå gardane, stein som er blitt disponibel i samband med rydding av jord, og som er noko grovare enn den du finn ved sjøen.

11 ulike kunstnarar, 3 norske og 8 utanlandske, skal jobba med rullestein frå Jæren.

Fleire saker