Ei bygd med gode svømmarar

Mens Osbadet i dag fyller 10 år må Os Svømmeklubb venta til februar 2017 med å feira rund dag.

– Saman med Osbadet gler vi oss over tilbodet og effekten badet har hatt på svømmeopplæringa i og rundt Os, seier formann i svømmeklubben, Tord Færøy.

Mens Osbadet organiserer både skulesvømming (30.000 besøk i året), babysvømming og oppfølgingskurs, tar Os Svømmeklubb imot medlemmar frå dei er rundt 6 år gamle.

– Ved sidan av dei aktive medlemmane, der fleire er i konkurransar, har vi fleire kurs for ungar i skulealder.

Smikkfulle kurs

Os Svømmeklubb arrangerer kurs i tråd med forbundet sin opplæringsplan, der dei yngste har tilvenning i vatn, det å ha hovudet under vatn, og crawl på programmet før dei går over til bryst, rygg og butterfly.

– Vi tar fire trinn i terapibassenget før vi går over i 25-metersbassenget og øver inn dei andre svømmeformene.

Kapasitet på bassenga og på instruktører set ei grense for kor mange dei kan ta inn.

– Det har stort sett heile tida vore fulle kurs og ventelister, ved opptaket no i haust var det nokre av kursdeltakarane som hadde stått eit år på liste for å få plass.

Gode svømmarar - med og utan medalje

Os Svømmeklubb har god dialog og samarbeid med klubbane i Bergen for ungdom frå Os som har kome eit stykke i alder og nivå innan svømming.

Med svømme-ekteparet Elin og Thomas Harlem, som var sentrale i stiftinga av klubben og som instruktørar, har det blitt fostra fleire god svømmarar i Osbadet, blant anna Tom Andree Moberg Johansen og søsknene Ariel og Sebastian Braathen.

– Vi har framleis fleire talent på veg, blant anna Elin og Thomas sin son, Emil (11), dottera til 71 grader nord-deltakar Gry B. Skarstein, Emma, og tvillingsøstrene Tracy og Janne Holm.

Les òg: Tracy slo Ariel sin rekord - i Ariel si drakt

– No har vi rundt 30 medlemmar, utanom dei som går på kurs. Ikkje alle desse driv med konkurranse. Det blir litt fråfall i ungdomsskulealder, spesielt hos dei som har svømming som sin idrett nummer to.

– Vi gler oss over eit veldig godt miljø, på tvers av alder og kva skulekrins medlemmane kjem frå. Vi gler oss òg over alle som blir betre å svømma i skjergardskommunen Os, anten dei har vunne medalje eller ikkje, seier Færøy på 10-årsdagen til Osbadet.