Ei god smørje

Bildeserie:

Full skjerm

1 av 10

For femte året på rad inviterer revygjengen Nor og Ne til mykje løye og fest i Symrasalen på Nore Neset. Med berre ei veke til premieren er det framleis mykje som skal på plass før teppet går opp 20. april.

- Vi er vel i rute, men har enno ikkje hatt ei einaste øving med heile gjengen samla.

Første gong primus motor Susan Askvik klarer å samla alle dei 13 involverte blir først på generalprøven, dagen før sjølve dagen.

- Det skal nok gå bra det òg. Tekstane byrja å sitja, så no er det berre å stramma det heile opp litt, smiler Askvik.

Nokre gamle og nokre nye

Årets revygjeng er ei fin blanding av gamle travarar og "nye" ansikt.

Revyveteran Jan Helge Corneliussen er blant dei nye skodespelerane ein får stifta kjennskap med på Symrascena. Sjølv om Corneliussen er ny, har Askvik sikra seg kontinuitet med fleire av dei som var med på suksessen i fjor. Blant anna har Linda Nytræ som dei "pussa støv av" i fjor helt seg støvfri og leverer songnumre av høg klasse.

Dei 10 på årets scene er: Jan Helge Corneliussen, Oddvin Bøthun, Robert Haugetun, Bjørn Aspevik, Andreas Døsen, Linda Nytræ, Sissel Kallekleiv, Guri Bugge, Anna Linden, Susan Askvik. Som i fjor har dei fått med seg Tord Søfteland og Steinar Lyssand i musikken og Tommy Hjelle til å styre lys og lyd.

Håpar på fulle hus

Dei siste åra har revyen trekt fulle hus på Nore Neset. Faktisk opplevde dei i fjor å måtte avvise folk i døra då det ikkje var plass til fleire.

- Vi håpar det blir like mykje folk i år som i fjor, då det var fulle hus og stor stemning på festane etter.

- Det er berre å kjøpa billettar, reklamerer Askvik.

Årets framsyningar fordelar seg over helgane 20. og 21. april og 27. og 28. april.

- Etter framsyningane blir det anten pubkveld eller dans til levande musikk, seier revydronninga.

Ikkje berre for Nore Neset

Som utanbygds (frå Øyro og ikkje Nore Neset) må denne journalisten berre innrømme at han var spent på om han klarte å ta poenga eller om dei blei for lokale. Det var det ingen fare for.

Revygjengen har fanga både historia om kvifor hamnesjefen blei sjuk, facebookivrige stortingspolitikarar, nysgjerrige trøndere og osingane sine haldingar til parkering og næringsliv på både overraskande og artige måtar.

Sjølv dei meir lokale innslaga om livet i grenda har dei løfta til eit nivå som gjer at også utanståande får dei med seg. Følg berre med når vêret skal meldast...