Ei hyllest til fjøsnissen

Bildeserie:

1 av 8

Måndag skal elevar frå Os kulturskule ha to julekonsertar i Oseana. Konserten blir ei framsyning basert på ein idé lærar Jon Søfteland Sæbø har hatt i magen ei stund.

Tysdag var Midtsiden på generalprøve.

– Eg spurde elevane kor mange som sette ut graut til fjøsnissen på julaftan. Det var få eller ingen. Dette med dei norske nissane trur eg dessverre er i ferd med å døy ut, og det er fjøsnissen lei seg for òg, fortel Jon.

Han har skrive manus til ei forteljing som blir fletta inn i konserten av konferansier og fjøsnisse Otto Hægland, som stiller som nissen Borg A. Fjell.

– Eg har hatt som mål å få opptre i Oseana og blei glad då Jon spurde om eg ville ta rolla, seier Otto, som har lang fartstid i revymiljøet i Os.

– Har du vore nisse før?

– Eg e' jo nisse heile tida, seier Hægland, som blant anna har malt «God jul» på bunnsmøringa under seglbåten sin.

Musikk, dans, tilbakeblikk - og nisseskikk

I framsyninga, som varer i cirka ein time, får vi sjå rundt 100 elevar frå ulike grupper og på ulike instrument.

Fire av dansegruppene er med, det same er vokalistar, gitaristar, elevar på trommer, tangentar, trompet, trombone og fløyte.

– Elevane tar også del i dramatiseringa om fjøsnissen, som både vurderer å flytta frå Os, der det ikkje er så mange gardar eller særleg med graut å få, og som er flink til å fortelja om Os i gamledagar.

Jon har studert Ossoga og nissen er innom alt frå livet på gardane til Osbanen i si forteljing.

– Vi blir også meir kjent med nissane. Visste du forresten at dei samlast til ein stor fest i Gavelen bak Møsnuken kvar romjul? røper Jon S. Sæbø.

VIDEO: Sjå eit kort samandrag av generalprøven. (Foto: Vidar Langeland)