Ei rar oppleving i Rødsliane

I 17-tida i går var politiet i Rødsliane for å sjå etter ein bil som hadde vore i grøfta.

No fortel meldar kvifor han varsla politiet.

– Eg veit ikkje om han køyrde med promille, men han oppførte seg veldig rart.

Køyrde utfor traktorveg

Det var i 16.15-tida at Trond Kaastad kom køyrande ned Rødsliane med bil og hengar. Tilhengaren var full av ved som skulle på hytta på Kvamskogen.

– Først såg eg at det sto ein bil i grøfta, så la eg merke til at det sat ein kar i bilen og vinka, seier Trond, som jobbar i brannvesenet og har ein god førstehjelp-CV.

– Det viste seg at han var uskadd, men at han ville ha hjelp til å bli taua ut av grøfta. Han køyrde ein grå VW Tiguan som var ganske skadd på høgresida.Det såg ut som om han hadde køyrd ned ein traktorveg før han hamna i gøfta.

Lovde å ta hengaren på igjen

Kaastad, som var uheldig og fekk brot i ryggen i sommar, er sjukmeldt og går på krykker.

– Eg forklarte at eg ikkje kunne ta hengaren av eller på igjen, at han måtte hjelpa meg med begge delar om eg skulle slepa han.

Bilføraren såg heller ikkje ut til å bry seg om åtvaringar mot at bilen ville bli skrapa opp langs fjellsida og bli meir skadd under «amatør-tauinga». Han ville ikkje venta på tauebil.

Stakk frå staden

Då Kaastad hadde slept tiguanen på vegen igjen var bilførar svært ivrig med å koma seg avgarde.

– Han prøvde faktisk å køyra mens slepetauet framleis var festa, seier ein hoderystande redningsmann.

Med det same han hadde lausna slepetauet stakk mannen i den skadde bilen frå staden, retning Os.

– Det sto bilar i kø begge retningar og først då alle hadde kome seg vidare etter tauinga vår, kom eg på at eg hadde eit problem.

– Med skaden min hadde eg ikkje sjanse til å ta tilhengaren på åleine, spesielt ikkje når den sto inne på ei lomme med grusdekke, eit godt stykke lågare enn hengarfestet på bilen.

Undrast over åtferda

Trond seier han ikkje hadde reagert om det berre var det å takka for hjelpa mannen hadde gløymt.

– Men når han stikk frå staden og veit at eg står igjen med ein tilhengar eg ikkje kan løfta, så byrjar eg å lura.

– Det tok litt tid før neste bil kom forbi, som eg heldigvis fekk stoppa så eg fekk veden opp til hytta.