– Ei stor glede å sponsa

På ei pressekonferanse i på Kuventræ i dag blei Hassan El Fakiri presentert som ny hovudtrenar for Os sitt A-lag.

El Fakiri har signert treårskontrakt og skal jobba fulltid for klubben, også med spelarutvikling på yngre trinn, utan at engasjementet kostar klubben ei einaste krone.

– For det første synest eg at det er riktig og viktig at firma som har sjanse til det støttar opp om gode tiltak. For det andre er det veldig gøy å vera ein del av dette, seier Ole-Vidar Skaathun.

– Alle var viktige

Han eig, via Dahlsveien Holding AS, vindauge-fabrikken H-vinduet Magnor AS, eit selskap som omset for rundt 100 millionar kroner og dei siste åra har gått med fleire millionar kroner i overskot.

Ved sidan av å vera ein av fem hovudsponsorar for Strømsgodset, har Magnorvinduet sidan 2006 vore Os Fotball sin største sponsor. I årets sesong har dei også støtta SK Brann med eit større beløp.

– Eg er også veldig glad for at dei andre selskapa blei med, seier Skaathun om Fløysand Tak AS ved gründar Gudmund Fløysand, Hodneland Bygginnredning AS og Partas AS.

Magnorvinduet tar halve kostnaden, dei tre andre selskapa deler på resten.

– Alle var viktige for å få dette spleiselaget opp i passeleg storleik.

Kvifor no?

Å auka frå å vera stor sponsor til å satsa på fulltidstrenar er eit stort steg. Men Skaathun stussa ikkje.

– Det gjekk forbausande kort tid før alle var med, seier styremedlem og sponsor Egil Hodneland.

Han jobbar med sponsormarknaden og representerte styret i formann Knut Haddal sitt fråvær i dag.

Sjølv seier Ole-Vidar at utviklinga av klubben dei seinare åra hadde mykje å seia for at han tente på ideen.

– Vi som har følgt med ser kva Haddal, resten av styret og no Bakkerud har skapt av fundament. Når dei no kom med så ambisiøse planar for A-laget så var det lett å tenna på ideen og å velja å bidra.