Ei tørr og solrik jul
Vi får ei jul med fint turvêr, og dei fleste alpinanlegga nærmast Os er opne.
Vêret ser ut til å halda seg stabilt gjennom jula.
Det er meldt lettskya og 3-6 plussgradar i dag, søndag, og sånn skal det halda seg nesten fram til nyttårsaftan.
Yr melder regn på dagtid julaftan, Storm melder opphaldsvêr også denne dagen. Elles er det meldt tørt til og med søndag 29. desember.
Fare for frost
Storm melder 1-2 minusgradar frå torsdag kveld til og med laurdag, Yr melder 3-5 plussgradar også desse timane.
Vindstyrken skal halda seg låg, frå 1 til 3 m/s.
Måndag 30. desember er det venta regn.
Opne alpinanlegg
Vi får ei jul med fint turvêr, men det er òg sjanse for å stå på ski.
Voss Resort opna allereie 16. november, det tidlegaste sidan 2002, Eikedalen opna dei første heisane 14. desember, men foreløpig er det berre barneområdet som har nok snø.
Furedalen Alpin hadde plan om sesongopning i går, men mildvêr gjorde at dei måtte utsetja på ubestemt tid.
I Myrkdalen har dei installert nnytt snøproduksjonsanlegg, eit arbeid som ikkje var ferdig då naboane i Bavallen opna. Men no er det snø og ope i heile anlegget.