– Ei ugle sat fast i mormor si pipe

Sjå video frå brannvesenet sin redningsaksjon hos familien Gausvik torsdag.

Kjetil Vasby Bruarøy
06. mai 2016 - 14:43

Det såg svart ut for ugla som sat fast i botnen av pipa til Olaug og Jan Gausvik, men så gjekk det rett til himmels med fuglen, på sjølvaste Kristi himmefartsdag.

– Det hender rett som det er at vi finn døde fuglar i pipene i samband med feiing, men så vidt eg hugsar er dette den første ugla vi har redda, seier brannsjef Stein Gjøsund.

Hans Marius Hauge og Magnus Askvik frå Os brannvesen rykte ut og fann den levande ugla rett innanfor feieluka i botnen av pipa.

Den blei sett varsamt ned utanfor huset og såg ut til å vera uskadd då den letta og fauk av garde.

– Lagde lyd heile natta

Olaug Gausvik fortel at ho oppdaga lydane i pipa mens ho sto på badet onsdag morgon.

Ho trudde først at det var ein fugl på taket, men også då ho kom heim om kvelden høyrde ho u-hu.

– Vi hadde barnebarn på overnattingsbesøk og ugla heldt på eit godt stykke utover natta. Vi prøvde å få den ut ved å demontera peisen, men det gjekk ikkje.

Brannvesenet blei kontakta og den godt sota ugla kom seg ut i det fri.

Les òg: Redda etter tre dagar i toppen av ei furu (video)

Les meir om

Lokal Brann og redning