Ein flaum av tette rør

- Dette er ekstremt! Telefonane haglar frå folk med frosne rør, seier rørleggar Kai Paulsberg.

Kjetil Vasby Bruarøymandag 11. jan. 2010 11:51

Rørleggarane i Os har ikkje vore med på liknande. I alle fall ikkje på mange år. Rørleggeriet fortel om 22 på venteliste, Engevik Rørleggerservice er fullbooka til torsdag og Norør fekk 40 telefonar berre på laurdag.

- I fjor tinte vi to rør, no har eg kome ut av tellinga. Eg var på jobb til klokka 23.30 i går, og det er tre dagar til vi er ledige igjen. Samstundes veks køen, seier Kjersti Hansen hos Norør.

- Middagen blei kald
Også Øystein Engevik fekk rikeleg med telefonar i helga.

- Eg trur det var 22 som ringte medan eg skulle eta middag, til slutt blei maten kald. No er vi fullbooka til torsdag, seier han.

Verre skal det bli
Kai Paulsberg hos Rørleggeriet seier det tok heilt av i førre veke. Utover veka blei det verre og i dag har ikkje telefonen stått.

- At det er meldt litt varmare kjem berre til å gjera det verre. Når kulda i bakken blir isolert av varmare snø på toppen kjem det til å frysa fleire plassar, trur han.

Han har 22 på venteliste. Jobben med å tina rør tar frå ein halv time til ein heil dag.

- Hald kjellaren varm
Paulsberg har vore ute på eitt frose avlaup, resten av det som har vore frose er innkomande vatn.

- Det frys i hovudvassledningen eller i rør i ytterveggar eller i kjellarar, seier Kai, og ramsar opp eit par tips til deg som ventar på rørleggar:

• Ha på rikeleg med varme i alle rom der det er røyr eller utstyr til vassnettet
• Dersom røra går i skap, ha skapdørene opne
• Prøv gjerne med hårfønar på røra, men ikkje eksperimenter med propan eller liknande

- Eg har høyrt at Os kommune fryktar vassmangel, sidan mange let vatn renna for å unngå at dei frys igjen. Det held med drypping, så lenge det er litt sirkulasjon så hjelper det.

Betre før?
Dei fleste med frose vatn bur i eldre hus, men også nyare hus slit med kulda. Behandlinga er straum på koparrør, varm luft eller varmt vatn i hovudvassledning eller rør-i-rør, som er i plast.

- I plastrøra pressar vi på med steam, tømer ut og kjører på igjen. Det kan ta lang tid, og i nokre tilfelle må det gravast opp utvendig.

- Er det lettare med dei gamle koparrøra, som de set straum på?

- Desse kan sprekka, så dei er ikkje betre. Plasten tåler frost, seier Kjersti Hansen.