Ein god marknad for nykomarane

Bildeserie:

1 av 15

Osdagane er over. Det same er finvêret. For denne gong.

Fjordfolk, som var hyra inn til å arrangera marknads- og aktivitetsdagane i Os sentrum, ser tilbake på ei god langhelg.

– Vi har fått fine tilbakemeldingar frå både tilreisande utstillarar, lokale verksemder og publikum. Vi synest spesielt at butikkane i Brugata var flinke til å auka aktiviteten i denne gata, og at satsinga på opptrappa aktivitet i hamna var vellykka, seier Marthe Kristensen og Christoffer Kobbeltvedt.

God debut

Blant nystarta, lokale verksemder som stilte ut var Bjørnefjorden Opplevelser og Unique Boutique, av tilreisande debutantar var Nemo Classic Diving og Os Bilsenter.

– Eg er her mest for å visa bedrifta og prata med folk. Eg har selt tre bilar mens eg har stått her, til folk frå andre stadar, så eg har køyrd litt opp og ned til butikken i Industrivegen for å få unna papirarbeid og levering.

– Men det har òg blitt selt bil direkte her på stand, fortel Daniel Grape frå Os Bilsenter.

Nemo Classic Diving har vore på marknad på Os før, med dykkartank. Denne gong sto dei og selte varer saman med samarbeidspartnar Bjørnafjorden Oppplevelser frå Øyane.

– Vi har vore ein del på tilsvarande utstillingar, men dette er kanskje den beste vi har vore på, seier Eivind Kjellevold frå Nemo.

– Til no har vi selt fem kajakkar, i tillegg har vi fleire interessentar.

Skvetten siger til MDG

I og rundt Os hamn blei det ekstra høg aktivitetet, ikkje berre av ungdom på den nye pumptracken som Os kommune har bygd, men med utstilling av Askeladden og cruise med vikingskip.

– Båten har gått i eitt alle dagar, og dette må vera den beste hamna eg har vore i, seier skipper, eigar av Bygstadskipet og historieforteljar Helge Kårstad.

– Mange av passasjerane kommenterer at det luktar så godt i båten. Eg skulle gjerne sett fleire trebåtar i Os hamn, legg han til.

Bjørnafjorden Opplevelser hadde opplæring og test av kajakk, dei same som Nemo selte, så folk både kunne prøva kva modell som passa best, og kanskje få lyst til å melda seg på kurs hos den ne verksemda frå Øyane.

I tillegg sette dei opp konkurranse for lokalpolitikarane, som i høve valet til hausten stilte ut inne på Øyro.

– Alle parti med unntak av eitt har padla. Høgre leia, men blei slått med eitt sekund av Frp. Så kom Geir Fossåskaret, som aldri har padla før, lente seg fram, gav gass og sikra sigeren til MDG med rein styrke. Eg padla ved sidan av i starten og det skvatt godt rundt kajakken hans, fortel Anna Fjæreide Helland og ler.