Ein halvtime med håp
Os starta andre omgang med å redusera til 1-2 og avslutta dagens NM-runde med ti mann.
Bildeserie:
Os tok i dag imot Nest-Sotra til første NM-runde. Nest-Sotra var i fjor 6 poeng frå 1. plassen i 2. divisjon, og stilte med osing Bjarte Haugsdal frå start og ny gutetrenar i Os, tidlegare Lysekloster-spelar Ståle Steen Sæthre, på benken.
Vertane er nøgd med rundt 200 publikummarar, men hadde sett fleire av dei mest rutinerte, skadeutsette spelarar som Marius Mikkelsen, Erik Kanestrøm og Rafael Villén, på kvilebenken.
– Vi viste nok litt for mykje respekt i starten, men gjorde som vi har gjort i dei to seriekampane til no, vakna litt etter å ha hamna bakpå 0-2, seier assistenttrenar Ørjan Håland.
0-1 ved Andreas Rødsand kom allereie i 3. minutt, på eit skot både underteikna og Os-keeper Anders Fossen Lunde trudde skulle gå utanfor. 0-2 ved Peter S. Nergaard i 11. minutt såg òg litt billig ut, men samla sett hadde gjestane ballen mykje, og bortsett frå nokre innlegg og eit frispark av Knut Spangelo Haga, og eit par cornarar, full kontroll på det som skjedde før pause.
Dei hadde og nokre større sjansar som Fossen Lunde redda, blant anna eit brassespark i retning kryssen.
Os - Nest-Sotra 1-4 (0-2)
Målskårar, Os: Thomas Lunde Fosen (49.)
Os: Anders Fossen Lunde - Torkel Hjertnes, Divaldo Cardoso (Ole Martin Lekven Kolskogen frå 57.), Adrian Valle, Knut Spangelo Haga - Thomas Fosen (Steffen Ljosheim frå 65.), Torgeir Lunde, Alexander Mjånes Tøssebro, Glenn Krossøy - Øystein Takle Eide (Enrique Crespo Søvik) og Anders Havsgård.
Gule kort, Os: Kolskogen og Hjertnes.
Os starta andre omgang meir offensivt, og fekk utteljing i 49. minutt. Thomas Lunde Fosen skaut frå skrått hald og reduserte til 1-2. Gleda blei kortvarig, storskåraren i 3. divisjon, Alexander Dang, gav gjestane 1-3-leiing minuttet etter.
Men Os hadde fått smaken på å skåra mål, og heldt fram med å prøva seg. Øystein Takle Eide blei stadig hissigare i steget, og fekk ei avslutting på mål med venstrefoten. Spangelo Haga og Krossøy heldt fram med å legga inn frå venstrekant, men ei brukbar heading av Torgeir Lunde, som keeper så vidt måtte gje retur på, var det nærmaste Os kom nok ei redusering.
Avslutta med ti mann
Rundt 80. minutt kom ei takling som vi høyrde lyden av over heile banen. Rune Aasheim Mo fekk gult kort, Alexander Tøssebro vrei seg i smerte og måtte hjelpast av banen.
– «Zlatan-skade», sa han då han kom på sidelinja, med referanse til den alvorlege skaden den svenske superspissen nyleg fekk, då han landa på strak fot og fekk pressa kneet feil veg.
– Han hadde smerter i kneet og er tatt til lege for sjekk. Eg håper det ikkje er så alvorleg, seier Håland.
I NM er det berre lov med tre byte, så Os måtte avslutta med ti mann. I 81. minutt hadde Os nok ein sjanse, i 82. minutt kom 1-4-skåringa.
– Eg er nøgd med førsteomgangen, men i andre omgang, når vi ikkje yter maksimalt, og Os er frampå, blei det jamt, seier Haugsdal etter kampen.
Likte å spela mot Os
Nest-Sotra-trenar Steffen Landro fekk eit godt inntrykk av dagens motstandar.
– Vi fekk to tidlege mål og hadde god kontroll. Som trenar skulle eg gjerne ønskja at vi gav endå meir, at vi fekk nokre mål til i denne perioden, i staden hamna vi litt på autopilot.
– Os stilte med eit ungt lag, og eg liker måten dei speler fotball på. Her er det fokus på utvikling og eg vil tru at det er bra å vera ungdom i ein klubb som Os.
No håper Nest-Sotra på å kjempa seg vidare i NM.
– Vi hadde ei god oppleving i fjor, som blei toppa med ein jamn kamp mot Rosenborg på Lerkendal. NM er eit eventyr, og vi håper på å koma lengst mogleg.
Her er nokre andre resultat frå NM:
Stord - Lysekloster 0-1
Austevoll - Brann 0-7
Bjarg - Fana 0-1
Trott - Åsane 0-4
Fyllingsdalen - Sotra 2-1
Fjøra - Sogndal 1-6
Løten - Kongsvinger 0-4
Fauske/Sprint - Bodø/Glimt 0-7
Sjå alle på fotball.no.