Ein klassefest skal gå frykteleg gale i Oseana i kveld

Ein klassefest går frykteleg gale når klassens sjefsmobbar og gjengen hennar kjem på festen og mobbeofra får nok. Dei får overtaket og må vurdere fleire løysningar.

– Kva kan du gjere når du har fått makt over nokon du hatar? Snakke dei til vett eller torturere?

Med mørk humor og stereotypiske karakterar som blir pressa opp i eit hjørne, tar stykket opp tema som mobbing og å stå for eigne meiningar med ein komisk vri.

Skal vidare til DUS-festivalen

Regissør Frøydis Flotve frå Os barne- og ungdomsteater fortel at kveldens framsyning er den lokale premieren på stykket frå ungdomsgruppa til teateret på Haugland.

– I slutten av mars skal vi delta på den regionale DUS-festivalen på Den Nationale Scene i Bergen. Her skal åtte grupper frå Hordaland visa fram sine produksjonar i Teaterkjelleren. Ut frå desse åtte tolkningane av «Den store klassepesten» vert ein produksjon vald ut til å representara Hordaland på den nasjonale festivalen på Det Norske Teatret i Oslo.

Desse vert å sjå på scenen i kveld:

Skodespelarar: Hanne Dahl, Isabell R. Aase, Mariell N. Olsen, Una Solheim, Marie F. Steinum, Leander Dyrdal Lie, Andrea F. Teigen, Ingeborg L. Larsen, Lukas Rysjedal, Maren L. Petersen, Elida S. H. Kordts, Frida M. Johannessen, Kristina Dale, Amber Merrett og Zofia Konieczka.

Regi: Frøydis Flotve

Den store klassepesten er skriven av Kjetil Indregard.

Neste premiere i mai

I mai er det borna i det lokale teaterlaget som skal på scenen i Oseana. Då med stykket «Prinsesse slim».

–Flotve fortel at ette er eit heilt nytt stykke - utarbeidd av teaterelevane, i samarbeid med instruktør og forfattar, Tor Arve Røssland.

Stykket vert å sjå i Oseana 7.mai.