Bjarte Samnøy blir KrF sin einaste representant i nytt kommunestyre, og kan bli avgjerande for kven som kjem i posisjon. (Foto: Bjørnafjorden KrF, Jakob Enerhaug)

Ein ufrivillig joker

Val 2019: Bjarte Samnøy (KrF) kan redda Frp og Høgre.

Av: Kjetil Vasby Bruarøy

Etter valet blei det klart at Frp og Høgre gjekk frå 18-17-fleirtal, som dei har hatt i Os, til 17-18. Frp mista to mandat, Høgre auka med eitt.

Sidan har det vore hektisk sondering og møteverksemd i komande Bjørnafjorden kommune, og det er ulike alternativ til kven som skal styra kommunen.

• Les òg: Kven tar makta - kven blir ordførar

Eit av alternativa som er lettast å sjå for seg er at Frp og Høgre klarer å inngå samarbeid med KrF.

– Vår rolle avhenger av andre 

KrF gjekk ned frå to til eitt mandat etter valet. Samtidig klatra Bjarte Samnøy på 2. plass forbi ordførarkandidat Jakob Enerhaug etter at personstemmene og slengjarane var talte opp. Enerhaug fekk flest personstemmer, men Samnøy fekk flest slengjarar.

– Eg synest det er trist at ikkje Jakob Enerhaug fekk plass, han er dyktig og engasjert, og er veldig klar for å yta ein innsats vidare. Helst ville eg sett at vi var i kommunestyret begge to, seier Bjarte Samnøy.

Så legg han til at det er andre parti som avgjer om KrF er ein joker eller ikkje.

– Om Høgre blir ståande saman med Frp, så kan blant anna vi bli sitjande som ein joker. Om Høgre finn nye samarbeidspartanarar, så har dei ikkje behov for å inkludera oss.

Vi reknar likevel med at Frp og Høgre har eller vil sondera med KrF. Kva då?

– Det er forhandlingsutvalet i partiet, og ikkje eg, som tar sonderingar og forhandlingar vi er involverte i. Vi har sagt at vi ønskjer ei endring i politikken, men vi må uansett forhandla. Samtidig er det ikkje enkelt å forhandla når du berre har eitt mandat.

Ulike erfaringar

Bjarte Samnøy er frå Fusa. Der har KrF ulike erfaringar.

– Vi har inngjekk eit samarbeid med Ap og KrF som havarerte etter nokre månadar. Seinare har vi smarbeidd godt med Høgre og Senterpartiet.

– No er det ny storkommune det skal forhandlast om, då er det fleire omsyn å ta.

I ei forhandling med Frp og Høgre, trass berre eitt mandat, vil Samnøy uansett prøva å setja KrF sitt preg.

– Eg forstår at samarbeidspartnarar tar sine samtalar om saker som skal opp, men eg set pris gode diskusjonar, og vil at desse skal vera mest mogleg opne. Politikarar kan vera usamde, men bjørnafjordingane fortener å høyra argument for og imot. Helst skulle det òg vore brei oppslutnad, ikkje 18-17, og eg håper både partia og folk frå ulike bygder er rause med kvarandre.

– Fusingane har vore redde for at det skulle bli for lite Fusa-politikk i Bjørnafjorden kommune. No har fusingane fått ein del sete i kommunestyrert, eg håper og trur dei er innstilte for òg å skapa god Os-politikk.

Fleire saker