F.v.: Arne Monsen, Eirik Søfteland og Tor Egil Hylland. (Foto: Kjetil Vasby Bruarøy)

Eirik fekk viljen sin - avsluttar Osfest med eksplosivt show

– Eg ba om pyro, men visste ikkje eg fekk desse dimensjonane.

image
image
image
Av: Kjetil Vasby Bruarøy

I morgon startar Osfest 2018, den femte festivalen i rekkja. Til å markera den halvrunde dagen har festivalarrangørane fleska til med ein god pakke med fyrverkeri.

– Eg sa ja då Eirik ba om pyro, og jaha då eg høyrde prisen, seier festivalsjef Tor Egil Hylland og ler.

I fjor var det TNT som avslutta Osfest, også i år blir det «dynamitt»:

– Eirik løftar Osfest og vi har lyst å hjelpa til med å løfta han vidare. Han er ein showmann og ei rockestjerne, og fortener skikkeleg pyro når han ber om det.

Då Osfest-programmet i april var komplett, var det klart at Eirik Strønen Søfteland, som i 2014 var første artist første kveld, i år blir siste artist siste kveld.

Hylland vil ikkje ha prisen i avisa, men den ser ut til ikkje å vera så langt unna det som har blitt brukt under bryggedansane til Os kommune. Forskjellen er at dette krutet ikkje skal blåsast i lufta, men brukast i løpet av Eirik sin konsert, som sistemann på scenen laurdag.

Første gong

Med unntak av nokre flammekastarar er det første gong Eirik får pyro på scenen, og første gong Osfest spanderer på seg pyroshow.

Men alt er ikkje opp til Hylland og Søfteland når det kjem til bruk av krut midt i folkemengder.

– Søknaden blei innvilga tysdag, seier varabrannsjef Arne Monsen.

Han var sjølv med på å starta Os Rockeklubb for nesten 40 år sidan, men påstår at det ikkje påverka vurderinga eller godkjenninga.

– Ansvarleg søkjar, pyroteknikar som skal gjennomføra dette, har levert ein god søknad med ein grundig ROS-analyse. Osfest har ein god plan for rømningsveg, profesjonelt vakthald og kontaktperson til oss, om det skulle bli utrykking til festivalen.

• Les òg: Stavangerkameratene møter publikum før festivalstart

Med Torkjell som gjest

I mai var han i finale mot Elg i Århundrets stemme på TV2, i april sleppte Eirik nok ein låt med bandet sitt, Sipher. På Osfest stiller han som Eirik og syng mest av andre sitt materiale.

– Det blir først og fremst eit rockeshow med coverlåtar, eg skal synga mange klassikarar, prøva å gje ein hyllest til store rockelåtar, låtar som fortener pyro. No gler eg meg endå meir til laurdag kveld, seier Eirik.

Med seg som gjestevokalist har han ein rikskjent osing, Torkjell «Toschie» Rød.

I 2005 vann han Spellemannsprisen med bandet Audrey Horne, i 2009 var han med på Det store korslaget på TV2.

– Eg gler meg veldig til å stå på scenen med Torkjell! seier Eirik.

Audrey Horne spelte på Søfteland Rock N LOL i 2012 og spelte inn musikkvideo på Askviknes i 2013.

Kven speler kor tid?

Her er rekkfølga dei to dagane:

FREDAG 10/8
Violent Gin
Majorleap
Stavangerkameratene
Madcon
Ammunition

LAURDAG 11/8
Vanja V.
Endre Nordvik
Tone Damli
Morten Abel
Staut
Eirik Søfteland

• Midtsiden samleside: Alle sakene våre om Osfest

 

Fleire saker