Eirik lager familiefest

Eirik Strønen Søfteland, som fredag syng Sinatra sin "My way" i konkurransen om å gå vidare og bli topp 3, har takka ja til å opptre på gratiskonsert på dagtid laurdag 6. juli under rockefestivalen Søfteland Rock N LOL.

– Vi er utruleg stolte av Eirik og glade for at heile Noreg tar imot han på den måten dei gjer. Uansett kva som skjer i innspurten med plassering trur eg det kjem til å bli veldig travel sommar for Eirik, med den merksemda han har fått, derfor er vi veldig takksame for at han har klarert med TV2 og takka ja til å spela på Søfteland, på gratis familiefest på dagtid denne laurdagen, seier festivalsjef Andreas Lindborg.

"Familiedagen" har vore eit vellukka tillegg til programmet på Rock N LOL dei siste åra, der små og store kan kosa seg på festivalområdet på dagtid, med grillmat og konsert av artistar som vanlegvis ikkje er så lett tilgjengelege, spesielt ikkje for dei yngste.

I fjor var det Samsaya og Datarock som spelte på familiedagen, sjå bilde og video, i år blir det Eirik Søfteland og Real Ones.

Eirik: – Ein fin måte å takka osingane på

Lindborg meiner Eirik passar ypparleg til å spela på familiedagen.

– Han er ein ekte rockar, men er samtidig allsidig og ein god entertainer. Eg trur han har mange fans i alle typar aldrar og eg er sikker på at publikum kjem til å ta godt imot han.

Eirik har lovd å spela den eigenkomponerte låta han imponerte med sist fredag, Gonna go my way (sjå framføringa på youtube), og dei to-tre andre låtane han tar på familiedagen.

– Eg har fått ei fantastisk tid i Idol og det er takka vera stemmene til tv-sjåarane og det eg opplever som ei fantastisk støtte frå osingane. Eg føler eg skuldar osingane ein konsert og då er Søfteland Rock N LOL den perfekte staden, seier Eirik, som har spelt med både KingCalling og The Beauty på festivalen tidlegare.

Med KingCalling på fredagskvelden

Familiedagen blir ikkje det einaste vi får sjå til Eirik under årets festival.

– Fredag kjem han med KingCalling og opnar festivalen på hovudscenen, fortel Lindborg.

KingCalling, som gav ut EP i haust, jobbar med nytt materiale, og har blant anna spelt inn ny musikkvideo i "Lidl-lageret" i Ådnadalen.

Frå før er det kjent at BigBang, Michael Paskalev, Honningbarna og Real Ones kjem til Søfteland i år.

Midtsiden samleside: Søfteland Rock N LOL