– Eit beredskapshus

Bildeserie:

1 av 10

I mai i fjor starta grunnarbeidet, i november starta bygginga og i går var det kranselag på den nye brannstasjonen til Os som er under bygging på Moberg.

SJÅ VIDEO NEDST I ARTIKKELEN

– Eg trur det var fleire som var glad for at eg berre skulle ta første spadetak, ikkje fleire, sa ordførar Terje Søviknes om anleggsstarten i mai 2011, og hausta samtykkande latter då han ønskte velkommen til kranselag onsdag.

Opningsdato med symbolsk verdi

Som vi skreiv i februar er planlagt opningsdato 12.12.2012, klokka 12. Eventuelt 12 minutt over 12.

Medan enkelte av handverkarane som sat rundt bordet i går lo litt, som om dei ikkje hadde tru på at stasjonen skal bli klar til då, forklarte prosjektleiar frå Os kommune, Tor Inge Døsen, kvifor målet er å klara denne morosame datoen.

– Den er lett å hugsa, både før stasjonen er ferdig og etterpå. Og så er det litt symbolikk i 12.12.12. Det er 60 år sidan dagens stasjon blei bygd og det er 20 år sidan politikarane i Os byrja å snakka om ny stasjon. Derfor kjem dette huset i tolvte time, sa Døsen.

Beredskapshuset

Den nye brannstasjonen skal også husa legevakten i Os. I tillegg er det tatt høgde for fleire byggetrinn, blant anna endå ein etasje over legevakten (som kjem i den delen av bygget som berre har éin etasje).

Kanskje kjem det i framtida ambulanse inn i ein utvida variant av bygget, og politi i eit tilbygg eller tilleggsbygg på tomta.

Uavhengig av dette vil brannsjef Stein Gjøsund snakka meir om beredskap i framtida. Brannvesenet har fleire roller, som redning, helse (first responder), krisehandtering og miljøvern, samtidig blir det stadig færre brannar.

– Også frå sentralt hald blir det snakka om å endra brannsjef-tittelen til "beredskapsleiar" eller liknande, fortel Gjøsund.

– Eit maskulint bygg

Grethe Haugland frå Link Arkitektur, arkitekten som har teikna brannstasjonen og seinare redusert den grunna ordre om å spara inn pengar, var også gjest og talar i går.

– Bygget liknar, konstaterte arkitekten.

– Og det er tydeleg at det er menn som har stått for ordren, for makan til mengde teknologi stappa inn i eitt bygg skal du leita ei stund etter.

Kjersti Hansen hos NoRør, som har rørleggararbeidet i bygget som truleg, etter Osbadet, har mest vatn per kvadratmeter i Os, fortel om ein stor og spennande jobb.

– Det er mykje sanitær, varme, kjøling, trykkluft (til dykkarar og røykdykkarar), varmepumpe, full sprinkling, vannbåren golvvarme i heile førsteetasje, også i garasjen, og vatn med høgtrykk til fylling av tankbil.

Trygg og solid

Brannsjef Stein Gjøsund fortalte at han var spent då han høyrte at Tor Inge Døsen og Mikal Leigland skulle leia prosjektet saman.

– Eg tenkte at det blei to store i éin sekk, spøkte Gjøsund om dei to ringrevane i byggebransjen.

– Men vi har jobba veldig fint saman og har gode møte om bygget.

Leigland, som har bygd mykje i Os, fortel at dette er hans første brannstasjon, men at bygget er ganske ordinært.

– Det som er spesielt, ved sidan av mange tekniske installasjonar, er tryggleik og backup. Bygget har ekstra fundament, toler mykje og skal kunna drivast gjennom ei krise, anten det jordskjelv eller langvarig straumbrot. Eller ei politisk krise, legg han til med eit smil.

Samla seg om stanga

Det nye beredskapshuset samlar mykje av det brannvesenet har ståande andre plassar, den nye tankbilen, som står i midlertidig garasje i gamle Vognhallen, skogbrannhengaren, som står i saltlageret ved motocrossbanen ved Sigurdsvika, og enkelte klenodium og anna utstyr plassert på Ulven og i eit lager i "Fossen".

– Det blir godt å få alt samla og vi ser fram til å få stilt ut noko av det gamle utstyret. Bygget blir ypparleg til opplæring og til å ta imot gjestar, for eksempel ungane som er her når vi har den årlege "open brannstasjon"-arrangementet, sa Gjøsund under omvisinga.

Stasjonen får undervisningsrom og kantine vegg-i-vegg, med flyttbar vegg i mellom som gjer at begge fint let seg utvida eller slå saman.

Så samla alle seg rundt hovudattraksjonen; stanga. Eller rettare sagt, det tildekka holet der stanga skal koma.

– Då eg jobba i Bergen hendte det av og til at det kom jentegjengar og banka på døra i helgene. Dei var på utdrikkingslag og ville inn og testa stanga, fortalte brannsjefen til dei tilsette ved legevakta som var på kranselaget.

VIDEO (02:58): Stemningsrapport og litt av talane og omvisinga under kranselaget. (Foto: Kjetil Vasby Bruarøy)