Eit internasjonalt utval tar turen til Os

Frå 1. til 9. september er 30 svært gode pianistar frå heile verda samla i Bergen for å delta i «The Edvard Grieg International Piano Competition» på Troldhaugen. Eit utval av deltakarane speler på Oseana Kunst & Kultursenter tysdag kveld.

– Eg er veldig takksam for det flotte samarbeidet vi har med KODE og Sigurd Sverdrup Sandmo, eit samarbeid som blant anna gjer det mogleg for oss å by på artistar av høgt internasjonalt nivå, seier Oseana-direktør Ole Tobias Lindeberg.

Til årets pianokonkurranse melde det seg 133 søkarar frå 36 land, og av desse er 30 pianistar frå 18 land inviterte til Bergen. Her skal dei konkurrera om ein førstepris som inkluderar heile 30.000 euro og ei rekkje prestisjefylde konsertoppdrag.

Alle innleiande rundar er lagt til Troldhaugen, med gratis inngang for publikum. Bergen Filharmoniske Orkester speler saman med finalistene i Grieghallen under finalen, søndag 9. september. Edvard Grieg internasjonale pianokonkurranse kan også følgast gratis via strømming både frå Norge og utlandet.

Oseana og Lysøen

– Arrangement er i hovudsak knytt til Troldhaugen og Grieghallen, men vi ønskjer å leggja til rette for at konkurransen også blir eit regionalt samarbeidsprosjekt.

– Takka vera god støtte fra Hordaland fylkeskommune kan nokre av dei utøvarane som ikkje kjem til finalen få oppleva andre delar av fylket, og knyta band til arrangørar i regionen som har gode arenaer for klassisk musikk, seier konkurransens direktør, og direktør for KODEs komponistheimar, Sigurd Sverdrup Sandmo.

– Vi vil òg gi deltakarane våre eit høve til å oppleva eineståande natur og kultur i Bergen og Hordaland, og samtidig ta del i den rike musikkarven i regionen vår, sier Sandmo.

Tysdag speler eit utval deltakarar konsertar på Kabuso i Øystese, i Erdal kyrkje på Askøy, Knarvik kyrkje på Knarvik, på Oseana Kunst & Kultursenter i Os og i Valestrand Kulturkyrkje i Sveio.

Deltagerne skal òg på utflukt med konsert på Lysøen til helga.

Edvard Grieg internasjonale pianokonkurranse blir arrangert på Troldhaugen av KODE Kunstmuseer og komponisthjem, i år for fjerde gong. Hovudsponsor for konkurransen er Stiftelsen Kristian Gerhard Jebsen.