Nokre minutt med ro for å få fokus på plass før ei trening i 2012. I dag flyttar klubben til ny hall på Kuventræ. (Foto: Kjetil Vasby Bruarøy)

Eit stort løft for karateklubben

Os Karateklubb set aldersgrensa ned og startar eige ungdomsparti når dei i dag flyttar inn i den nye hallen på Kuventræ.

Av: Kjetil Vasby Bruarøy

Med ei rekkje NM-gull og internasjonale medaljar har Os Karateklubb sportsleg sett vore den beste i Hordaland i rundt 25 år.

Den 35 år gamle klubben har ikkje hatt dei mest moderne fasilitetane den siste tida, men dette endrar seg radikalt frå i dag.

– Vi er veldig glade for at vi fekk treningstid i den nye dobbelhallen på Kuventræ, og for at vi fekk treningstid på dei same vekedagane vi hadde i gymsalen til Os ungdomsskule, seier hovudtrenar Cato Bruarøy.

Frå i dag er treningane flytta til Kuventræ.

• Bildeserie: På innsida av den nye dobbelhallen

– Vi gler oss veldig! Gymsalen i Os sentrum er sentralt plassert og var heilt grei, men å få trena i ein heilt ny hall gir ny inspirasjon! Sentralidrettsanlegget på Kuventræ, med Osbadet, kafé og Actic, er dessutan ein fin plass for foreldre og søsken å venta eller å henta dei som har vore på trening.

Opnar for 6-åringar

Når nyehallen på Kuventræ no er på plass seinker karateklubben aldersgrensa frå 8 til 6 år.

– Vi har i mange år hatt familiekarate, foreldre eller besteforeldre som trener saman med ungar frå 4 år og opp. Dette har vore i gymsalen i Øyane, og familietilbodet held fram som før.

– Men aldersgrensa for born som stiller utan følgje på trening i Os har vore 8-9 år. No blir det eige barneparti frå 6 år, og vi kjem til å ha svært erfarne instruktørar på plass i nyehallen, seier trenar Cato Bruarøy.

Ny ungdomsavdeling søker fleire gutar

Ein stor del av medlemsmassen er tenåringar som trener og konkurrerer aktivt.

– Mange av desse er jenter, vi har kanskje den største jentegruppa i fylket. No startar vi eige ungdomsgruppe, og der håper vi å få med endå fleire gutar.

Mosjon og koordinasjon

Sjølv om klubben har fostra mange utøvarar i noregstoppen, er dei fleste i karateklubben mosjonistar - eller bruker karate som idrett nummer to.

– Mange av dei vaksne er her for mosjononen sin del, mange av ungane har karate som idrett nummer to.

– Karate kan styrka både sjølvdisiplin og koordinasjon, dessutan er det mange som synest kampsport er spennande og gøy, men som samtidig ønskjer å halda fram med lagsport eller andre idrettar, seier Bruarøy.

Os Karetklubb er ikkje dei einaste sport, eller kampsport, som kan gle seg over treningstid i ny dobbelhall.

• Les òg: Kven skal trena i den nye hallen?

Fleire saker