Eksklusivt i Nordstrøno

Heilt sidan 1994 har engasjementet ved Nore Øyane skule vore stort. Kvart år har dei organisert innsamlingsaksjonar anten i samband med TV-aksjonen eller i andre samanhengar.

- Eg fekk i oppgåve å finna ei skule som hadde utmerka seg.

- Då eg tok kontakt med superkoordinatoren Tove Hille her på Os var det ho som fortalte meg om Nore Øyane Skule.

- Børge (Lunde, rektor, journ.mrk) var litt uroa over at dei var ei så lita skule. Men det spelte ikkje noko rolle for oss. Vi ønskja å gje litt tilbake til nokon som gjer noko ekstra og spesielt, fortel aksjonsleiar for TV-aksjonen i Hordaland, Åse Schytte om bakgrunnen for vitjinga på Nordstrøno.

Stå opp mot urett

Årets TV-aksjon som blir arrangert sundag 21. oktober går til arbeidet Amnesty International som ønskjer å auke barn si forståing av verdiane tryggleik, rettferd og respekt.

- Barn har ei sterk rettferdssans og bryr seg når dei les om andre som blir handsama urettferdig.

- Det er desse bodskapa vi ønskjer å ta med oss til elevane her ved skulen i dag, forklarar aksjonsleiaren.

Må få tenkje sjølv

Mottoet for aksjonen er "Stå opp mot urett". Elevane ved Nore Øyane skule fekk gjennom eit show inneholdande leikar, aktivitetar, song og underhandling forskjellege døme på korleis ein kan gjera det.

- Synes de at det er rett at eg bestemmer at kva de tenkjer? undra programleiar Tonje Kaada.

- Neeeei, var det unisone svaret. Ungane i på Nordstrøno vil bestemme sjølv. Kva dei har lyst å bli og kva dei vil tenkje på.

- Men slik er det ikkje over alt i verda, forklarte Kaada som tok ungane med gjennom dei viktigaste punkta i FN sin Barnekonvensjon.

Berre å melda seg

Tove Hille er lokal aksjonsleiar for TV-aksjonen i Os. Ho fortel at det tidligare i veka var 30 som hadde meldt seg som bøssebærarar.

- No er det enno ei stund til fristen går ut, men vi treng omlag 200 så det er berre å melda seg, fortel Hille.

Om du har lyst å gjera ein innsats 21. oktober kan du ringa 02025, sende ein SMS med TVA til 2080 eller kontakta Hille på 916 72 910.

VIDEO, 3:17: Få glimt av aktivitetane og konsertane til Celine Helgemo og Christine Sandtorv (foto: Andris Hamre)