Eldste på marknaden?
Besøksrekord: Gudmund Waal har drive antikkforretning i Bergen og stilte med varer frå krigen, forsteina kråkebolle og flintøks for sal.
Bildeserie:
Nokre hadde gjort som invitasjonen seier; «kom som du er, ta med det du har» eller det som kona vil ha ut av garasjen, andre stilte på Ulvenmarknaden med ekte antikk, bildelar andre kunne ha nytte av eller gamle bøker og blad.
– Eg la ned antikkforretninga mi i Bergen for to år sidan. No stiller eg på marknad for å selja restlageret, fortel Gudmund Waal.
Mesteparten av utstillinga hans besto av effektar frå krigen, frå høge, varme vaktsko til hjelmar og bajonettar.
– Dette er nok det eldste eg har, seier han, og held fram ein forsteina kråkebolle og ei flintøks.
Rekordbesøk og godt sal
Sjølv om det var mykje som skjedde denne laurdagen, blant anna Ulvenmarsjen, opning av nærmiljøanlegg i Øyane og Osmeisterskap i symjing, var det uvanbleg tett mellom folka på årets marknad.
– Dette er nok rekord. No er eg spent på kor mange vaflar Øyvind Tøsdal sel i dag, seier Gustav Bahus.
Så blei han opptatt med å selja varer. To tåkelys til ein gamal amerikanar gjekk for til saman 800 kroner. Truleg meir enn bilen kosta den gong den var ny.
Stor bilutstilling
Vanlegvis er det ein og annan veteranbil på Ulvenmarknaden, i år var det ekstra mange.
– Først kom folkevognklubben, så Bergen Veteranbilklubb.
– Då 25 bobler skulle ut, ikkje alle ville gå med ein gong heller, og 30 andre veteranbilar skulle inn, blei det ekstra hektisk for parkeringsvaktane med dirigering. Men det gjekk bra, forsikrar Bahus.
Gamal grammofon
Om det var gamal Amazon i bilutstillinga veit vi ikkje, men på sjølve marknaden fann vi noko som likna ein gamal grammofon.
– Det er ein norskprodusert platespelar av merket Radionette som tar 25 singlar på vinyl. Den har to stiftar og speler alle etterkvarande automatisk, fortel Ivar Stalheim frå Voss.
Stalheim har vore samlar i mange år. På Os prøvde han å selja Radionette-spelaren sin for 5000 kroner.
– Det blei berre produsert 400 eksemplar av den. Den blei for dyr for privatpersonar og kafeane, som tente pengar på jukeboksar, ville ikkje ha inn spelarar dei ikkje hadde inntening på, forklarar han.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.