Fkhs Invest AS, som blant anna eig over 80 prosent av Fløysand Tak AS, har lagt Byvegen 81 ut for sal.
Eller rettare sagt, dei vil selja aksjeselskapet Byvegen 81 AS, som eig bygget med same adresse.
– Vi vurderer å selja for å konsentrera oss meir om huset dei andre selskapa våre held til i, seier Asle Andersen frå Fkhs Invest AS.
Fkhs Invest eig også Industrivegen 63, bygget Cha Zet Aktivitetssenter bygde og dreiv helsestudio i.
Fløysand Tak AS og Fløysand Blikk AS er blant Fkhs-selskapa som i dag held hus i Industrivegen-bygningen.
Råkar ikkje Proff Verktøy
Byvegen 81 AS har Prosjekt Vest Bygg AS og Proff Verktøy AS som leigetakarar.
Proff Verkøy har same eigar som bygget, og blei tidlegare i haust utsett for grovt tjuveri, eit tap som ikkje blir dekka av forsikringa.
– Det er ingen kopling mellom salet av bygget og dette tjuveriet.
– Proff Verktøy er framleis leigetakar og det er ikkje planar om avvikling av dette selskapet, seier styreleiar Knut Haddal.
179 kvadrat til 2,6 millionar
Eigedomen som er for sal har ei tomt på 358 kvadratmeter, 10 parkeringsplassar og eit bygg på 179 kvadratmeter.
Bygningen blei renovert då Fkhs Invest overtok i 2009 og har i dag leigeinntekter på 244.000 kroner.
– Det er ikkje sikkert at vi sel, det kjem an på marknaden og prisen eventuelle interessentar vil betala, seier Andersen.
Prisantydningen er på 2,6 millionar kroner.