Næringsliv | 31. des. 2014

Endå eit bygg i sentrum er selt

Osbygg, som inneheld over 900 kvadratmeter med bokhandel, 7 leilegheiter og 8 hyblar, skiftar eigar klokka 12 i dag.

Endå eit bygg i sentrum er selt
Osbygg, der Osøyro Libris er ein av leigetakarane, skiftar eigar i dag. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyonsdag 31. des. 2014 09:26

For to veker sidan kjøpte brørne Aspenes over 2000 kvadratmeter med næringslokale i Os sentrum.

Les òg: Bankbygga er selt

I dag klokka 12 skiftar bygningen som blant anna Osøyro Libris (M K Olsen Bok- og Papirhandel AS) er leigetakar i, eigar.

Lyssand Eiendom AS, som eig bygget, er selt til Os kommune sitt eigedomsselskap, Os Bygg og Eigedom AS. For eit år sidan kjøpte Os Bygg og Eigedom Oshjørnet tvers over gata.

Signerte kontrakt i går

– Vi tar eit grep i sentrum. Igjen, seier administrerande direktør i Os Bygg og Eigedom, Ottar Randa.

– Kjøpet blei avgjort på styremøte måndag kveld, i går signerte vi kontrakt med seljar.

Bygningen er på cirka 950 kvadratmeter og går over fire etasjar, der bokhandelen leiger første og delar av andre, mens andre- og tredjeetasje husar til saman 7 leilegheiter. På loftet er det 8 hyblar.

– Bygget har mange kallenamn. Sjølv har eg alltid kalla det Tøsdalsbygget, sidan det var Odd Tøsdal som i si tid bygde det. Andre kallar det gjerne Lyssand-bygget, sidan det er eigd av Svanhild Lyssand, eller M K Olsen-bygget. Men det heiter Osbygg på papiret.

Tøsdal bygde Osbygg saman med Sparebanken og Annanias Skorpen, som var den som i si tid fekk hand om tomta. Osbygg sto ferdig i 1954.

Randa ser for seg å gje bygget eit nytt namn, gjerne Torggarden eller Torghuset.

Kan koplast med Torget

Ordførar Terje Søviknes er glad for avgjerda.

– Fleire gode eigedomar i Os sentrum har fått nye, langsiktige eigarar det siste året, frå Aspenes-brørne sitt kjøp av bankbygga til Joagruppen sitt utvida engasjement på Øyro med kjøp av Legangerhjørnet. Med nye og større eigarar er det duka for betre framdrift med prosjektet «Liv på Øyro», seier Søviknes.

I tråd med framdriftsplanen for Øyro er det det sokalla Bydraget, gata frå Lundehjørnet til gamlebanken (GH Interiør), som først skal få seg eit løft. Torget er del av dette draget og er venta å få dei første fysiske oppgraderingane.

Les òg: Bydraget eitt steg vidare

– Når vi no har hand om dette bygget ser vi for oss at Torghuset og Torget, som vil få ein eller annan form for overbygg av glas, delvis kan koplast saman, seier Ottar Randa.

– Men i første omgang vil vi gje fasaden eit løft. Vi vil ha vekk bølgeblekk-platene å få fram murfasaden, kanskje toler også bygget nokre ornament, seier Ottar Randa.

Han legg til at han hadde intensjon om å prientera leigetakarane i bygget før pressen omtalte kjøpet, men let seg likevel intervjua då Midtsiden hadde fått nyss i handelen.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.