Eirik og Leif Herland, medprodusent og bandkompis under Osfest i år. I dag er Sipher klare med debutalbumet. (Foto: Kjetil Vasby Bruarøy)

Endeleg, Sipher!

For mange har det vore ei lang ventetid, kanskje mest for Eirik Søfteland sjølv. I dag er endeleg debutalbumet «Atlas» ute!

Av: Kjetil Osablod Grønvigh

Midtsiden treff Eirik Søfteland på telefon frå Oslo.

Lyden av høge hælar leiar til første spørsmål;

– Du har danseskoene på igjen? 

– Ja, på laurdag skal eg vera med på ei «Allstar-Skal vi danse»-sending. Så du har rett, det er lyden av dansesko du høyrer. 

– Eg skal mellom anna dansa med Einar Nilsson, kjend frå «Tid for hjem» på TV2. Saman med proff-dansar Anette Stokke, ho og frå Bergen, skal vi slå oss laus til «What Does The Fox Say?» av Ylvis. Saman er vi litt ein slags Vestlandsbande her i dag.

Den som ventar på noko godt ...

Eirik innrømmer lett at debutplata har latt seg venta på. 

– Kva var det som tok så lang tid, Eirik?

– Det har vore ein god kombinasjon av ting eg ikkje rår over, andre ting eg har forplikta meg til, men mest av alt; det måtte kjennast rett ut, kjem det ærleg frå Eirik.

– Eg kom med ein godt plassert smaksprøve av kva som var på veg, då NRK var innom Os med sommerbåten i 2015. Men då var eg framleis «berre» Eirik Søfteland. Det var ikkje før eg samla dette musikalske prosjektet under namnet «Sipher» at ting byrja å falla på plass.

Ein liten teknisk krøll tidlegare i sommar gjorde at plata ikkje kom som først planlagt, men no er ho altså her. På CD, på vinyl og på alle digitale plattformar.

– Korleis har dei siste dagane vore, Eirik, og korleis var det å vakna opp i dag?

– Eg vakna omtrent med danseskoene på, stiv og støl i heile kroppen, og så plutseleg gjekk det opp for meg; f..., eg skal sleppa plate i dag, eg! Det var vel ikkje før for nokre dagar sidan at eg endeleg klarte å kjenna på, at no skjer det, Eirik!

Førehandomtalar og kommentarar i sosiale media fortel i alle høve at det har vore verdt ventetida. 

Borat eller kilt?

Det har storma godt kring «Skal vi danse»-produksjonen den siste veka.

– Er dette noko du har lagt merke til, og har du fått streng beskjed om at du ikkje får ta på deg vinnarantrekket frå 2013? (Eirik hamna blant anna på framsida av Dagbladet då han «gløymde» undikk under kilten i finalesendinga).

– Nei, eg vil ikkje seia at den siste vekas dramatikk er noko vi legg merke til, men eg trur nok at produksjonen har godt av at vi tidlegare vinnarar og deltakarar kjem inn og løyser opp stemninga litt, kjem det alltid like sympatisk frå Eirik.

«Atlas» kan du kjøpa fysisk eller lasta ned frå i dag.

Du kan sjå Eirik på TV2 på laurdag frå klokka 19.30.

Fleire saker