Er du like vittig som Jon?

I vår starta standupkomikar Jon Hægland frå Os eigen standupklubb i heimbygda.

Starten var god, med fulle hus og ventelister på dei første showa. Sidan har det variert ein del med publikum, uavhengig av kva namn som har stått på plakaten.

– Eg fekk tak i fleire store namn i haust, men det ser ikkje alltid ut som om det har noko å seia kven som kjem, folk utanfor bransjen kjenner gjerne ikkje til kven som er dei flinkaste, seier Jon.

Dex Carrington hadde stort publikum, Dag Sørås hadde knapt halvfull sal.

– Men publikummet i Os er blant dei beste i landet. Dag har turnert over store delar av landet og synes stemninga på Os var heilt spesielt god, seier Christoffer Schjelderup.

– Det der kunne eg gjort betre

Jon og Christoffer sto på scenen på Irish Cat i går. Det gjorde også Pål Rønelv og Jan Tore Kristoffersen.

– Det startar gjerne med at du ser ein komikar som får deg til å tenkja "det der kunne eg gjort betre", seier Rønelv.

Rønelv starta samtidig med "gudfaren" Schjelderup, og innrømmer at han nok var ein sånn komikar i starten, ein som ikkje imponerte og som kanskje fekk andre til å få lyst til å prøva seg.

– Og no er det eg som har blitt ein sånn, den som ikkje er så flink, påstår Kristoffersen, som avslutta showet på Os 2. juledag.

– Enkelte har det

Om både debuten og dei første forsøka er litt falmande, seier Schjelderup at fleire likevel held ut til dei blir flinke nok.

– Enkelte har det med éin gong, gode poeng og god framføring.

– Men mange rotar litt i starten og får framføringa øydelagt litt grunna meir tekniske feil, at dei gløymer teksten, står for langt frå mikrofonen eller ikkje får poenga fram fordi dei er nervøse.

– Det er langt frå alle som får publikum til å le i starten. Pål var forferdeleg, han gjorde alt feil! Jan Tore og Jon var heller inga stjerne, men alle har halde fram og framfører no stødig.

Jaktar på lokale komikarar

I går var det 25 i salen på klubbkvelden på Irish Cat. Mange nok i det vesle lokalet til at stemninga blei god, men langt færre enn arrangøren hadde håpa på.

– Vi har kanskje hatt eit litt tett program i haust. Vi held fram med standup, men no blir det ei stund til neste gong, seier Hægland.

I mellomtida vil han førebu ein workshop på Os, der osingar som vurderer å prøva seg på scenen kan koma og få opplæring.

– Det hadde vore veldig kjekt med fleire osingar på scenen, å fått eit skikkelek komikarmiljø i Os, seier Jon, som no sjølv flytter heim frå Bergen.

I går trengte han berre seia ordet "kloggar" så byrja folk å le. Det er lett å vera morosam i si eiga heimbygd.

– Eg har kontakta nokre scenevante osingar, som Jan Helge Corneliussen (som blant anna har vore konferansier på filmfestivalen i Os) og "Maggen" (Magnar Lien, som selte fullt hus på Opus gjennom store delar av sommaren 2009).

– Men det er sikkert mange andre osingar som kunne ha eigna seg, gjerne yngre gutar og jenter også.

– Og det er ikkje alltid dei som er mest vittig i veneflokken som har dei beste tekstane eller den mest morosame stilen.

Ingen mjuk start

På ein komikar-workshop kan du få praktiske tips til både tekst og framføring. Men komikarane som var i Os i går meiner det ikkje er vits å prøva materialet for eit lite fagpanel av eit publikum.

– Folk kan gjerne øva på å framføra på ein workshop, men det er enklare å debutera for eit stort publikum enn for eit lite publikum.

– Vi som er komikarar sit gjerne og analyserer, vi sit ikkje og gapskrattar - då skal du jaggu vera god, seier Schjelderup.

– Då er det betre å ta kontakt med Jon, eventuelt møta på workshop, når den dagen kjem, og så debutera med fem minutt på ein klubbkveld til våren, anbefalar han.