midtsiden

- Er ikkje uroa

Sjølv om fleire butikkar på Amfi Os har gitt seg, er ikkje senterleiar uroa. Nye er på veg inn.

Av: Andris Hamre

I går meldte Midtsiden.no at Tor Owe Rennemo legg ned musikkbutikken på Amfi Os i februar neste år. Tidligare i haust har både Divakjoler og Milly-Molly-Mandy stengt dørene.

- Det er trist at butikkar vel å legga ned, seier senterleiar Anne Kristine Tøsdal om utviklinga.

Nye på veg inn
Ho er ikkje uroa for senteret si framtid, sjølv om det i desse dagar står fleire lokalar ledige.

- I dei ledige lokala nede er det allereie klart kven som kjem inn, sjølv om eg ikkje kan fortelja deg det enno, seier Tøsdal.

Ho reknar med at det i løpet av våren/forsommaren vil vera drift i dei ledige lokala. I andre høgda har dei fleire intressentar som vurderer tilboda dei har fått frå Amfi Eiendom.

- Det rører seg mykje meir i marknaden no enn for eit år sida, så eg har god tru på at det vil løysa seg om ikkje så lenge.

Graving i januar
Det har lenge vore klart at Coop Extra skal inn på senteret. I september blei utvidinga av senteret godkjent i kommunestyret. Senterleiaren reknar med at gravemaskinene kjem på plass i midten av januar.

- Akkurat no er det ein geolog inne og dobbeltsjekkar grunnforholda slik at vi har dei under kontroll før gravinga tek til, fortel Tøsdal.

God omsetning
Med berre få dagar att til jul fortel Tøsdal om god omsetning butikkane på senteret.

- Vi ligg omtrent som i fjor, men alt er forskjøve ein dag sidan juleaften er ein dag seinare i år enn i fjor.

- Eg reknar med det blir fullt trøkk her dei siste to dagane før jul, som vanleg, så eit råd til dei som vil ha det litt roligare er å gjera unna julehandelen i dag, smiler senterleiaren.

Fleire saker