Erik Vaktskjold (nr tre frå høgre, med sommarklipp) og resten av den norske åttaren i Italia tidlegare i august. (Foto: Giacomo Broglio @j.bluff)

Erik Vaktskjold tok 4. plass i Italia

Noreg lånte båt frå Os då dei deltok i Coupe de la Jeunesse for første gong. Om bord sat òg ein sterk roar frå Os Roklubb. 

Av: Kjetil Vasby Bruarøy

Bilde: Oliver Melnes (Sarpsborg roklubb) Jacob Gundersen (Sarpsborg Roklubb) Henrik Glittenberg (Bergens Roklubb) Håkon Møller (Sarpsborg Roklubb) Marius Pedersen (Stavanger Roklub) Erik Vaktskjold (Os Roklubb) Oscar Wolfhardt (Norske Studenters Roklub) og Hugo Haavind (Norske Studenters Roklub). Cox er Helene Alvheim (Bergens Roklubb).

Den første helga i august deltok Noreg som gjestenasjon i Coupe de la Jeunesse i den italienske byen i Corgeno, nordvest for Milano.

Coupe de la Jeunesse blei etablert i 1985, og er ein regatta for junior-roarar på vei opp mot det internasjonale toppsjiktet.

– Å bli tatt ut til å ro var veldig stort, at vi gjorde det så bra var ein bonus, seier Erik Vaktskjold.

Erik er fødd i 2001 og er sisteårs junior. 

– Sidan junior-VM, som gjekk på same tid, er i Japan, var det mange flinke europeiske roarar som ikkje deltok i VM, men i staden løfta nivået på dette stemnet.

4. plass i A-finalen

Noreg hadde med lag i damer 4x og damer 4-, herrar 1x, herrar åttar. Båten dei brukte er den Trond Mohn gav til Os Roklubb i 2009.

– Det var litt stas at det var vår båt dei brukte, og kjekt å ro ein båt eg kjenner så godt, seier Erik.

Han har lagt i hardtrening på Årungen i tre veker før han reiste.

– Denne sommaren blei det lite ferie, men ein tur til Italia gjorde godt, sjølv om det ikkje var for å slappa av.

Sidan Noreg var gjestenasjon fekk dei ikkje ro finale. Unntaket blei i åttar, der det berre var sju båtar med. Noreg blei seeda sist, men heldt seg med teten og rodde inn til 4. plass.

– Vi frykta jo at vi skulle koma på sisteplass, så vi var veldig nøgde etterpå! Det var godt å sjå at vi heng med. Vi slo blant anna Sveits, og var nær på å slå Italia, som tok 3. plassen.

NM er neste mål

Neste mål for Erik er NM på Årungen i september. Der stiller Os Roklubb sterkt, og Erik skal ro både åleine og saman med andre.

– I singel ror eg som junior, i dei andre som senior, grunna resten av mannskapen sin alder.

– Eg skal nok ro saman med Erling, og det blir gøy å ha med seg ein sånn motor, seier Vaktskjold om klubbkameraten Erling Holst Øyasæter, som ror senior-VM neste helg.

Fleire saker