Erlend fekk svart belte

I helga var nesten alle karateinstruktørane i Os på treningssamling i Irland.

Siste dag i samlinga var det gradering, og Erlend Slettevold, som fylte 20 år måndag i førre veke, gjekk opp til svart belte 1. dan.

– Sensei Jon Wicks 8. dan sto for graderinga. Erlend gjorde det knallskarpt og fekk skryt av Wicks, seier Vidar Mjånes, ein av instruktørane frå Os Karateklubb.

– Vanlegvis etter ei gradering så blir det pirka litt på ting som ikkje er 100 prosent, før utøvarane får svar på om dei klarte det eller ikkje. Erlend derimot fekk berre ros, fortel Mjånes.

Erlend byrja å trena karate som 13-åring og har, ved sidan av å bli svært god teknisk, frå starten vore ein god fighter. Erlend er storebror til eit anna stortalent frå Os, Åsmund Slettevold.