Erling Holst Øyasæter, her under NM i 2017. (Foto: Estela Re-Ma)

Erling H. Øyasæter tatt ut på landslaget

– Det var veldig kjekt å få denne beskjeden rett før jul, seier ro-talentet frå Os.

Av: Kjetil Vasby Bruarøy

Erling Holst Øyasæter (24) fekk fredag beskjed om at han er del av Norges Roforbund si elitegruppe i 2019.

– Det var ein veldig god beskjed å få. Uttaket ser førebels ikkje ut til å vera offentleggjort, men eg har fått både kontrakten og programmet for neste år, seier Erling på telefon frå hyttetur med familien.

Han la opp som sisteårs junior i 2012, gjorde comeback i 2014 og fekk ro U23-VM i 2016. I sommar fekk han verdscupdebuten sin (senior), der han òg fekk ro dobbeltfirar med Olaf Tufte.

Fekk positive signal

Erling tar no steget opp frå utviklingsavdelinga på landslaget til elitegruppa.

– Eg fekk nokre positive signal i haust, og då eg høyrde at landslaget skulle dela elitegruppa opp på nytt, skimta eg håp.

Dei som frå før er gode nok til å ro OL blir tatt opp i eiga OL-gruppe, noko som gir rom for nye namn i elitegruppa.

– Eg meiner det er seks utøvarar i OL-gruppa og 10 i elitegruppa. I tillegg kjem utviklingsgruppa.

– Ifølgje programmet skal elitegruppa og OL-gruppa reisa og trena mykje saman.

Kan kvalifisera seg til OL 2020

I 2019 blir det fleire treningsopphald i utlandet enn før. Den første testen blir samlinga før EM og, om han kvalifiserer seg, EM 31. mai.

– Etter EM er det to verdscup, så kjem VM, som er kvalifisering til OL i Japan i 2020.

– Det blir eit veldig spennande år, og eg er innstilt på å kjempa hardt for å kvalifisera meg til flest moglege meisterskap.

Stolt klubb

Os Roklubb er stolt over å ha fått ein utøvar på landslaget.

– Han er einaste landslagutøvar klubben har hatt, utanom Bård Alfred Monsen, som var aktiv fram til 2004, fortel rosjef Eirik Vevatne.

– Vi i klubben er naturlegvis stolte, og eg veit at både Erling og dette uttaket er til stor inspirasjon for ungdomane vi har i klubben.

• Les òg: Os tok to titlar i UM

Vevatne gler seg på Øyaseter sine vegne. Landslagsdeltaking med mykje reiseutgifter stiller visse økonomiske krav til klubben, ei utfordring klubben tar med eit stort smil.

– Men det er mogleg at vi blir litt meir synlege ute i sponsormarknaden i månadane som kjem. Lokalsamfunnet skal få høve å støtta topproaren vår på veg mot EM, VM og kanskje OL, seier Eirik.

 

Fleire saker