Sport | 27. juni 2018

Erling rodde med Tufte

Erling Øyasæter debuterte i verdscupen med å ro dobbeltfirer saman med verdsstjerna og rolegenda Olaf Tufte.

Erling rodde med Tufte
Den norske dobbeltfireren med Olaf Tufte (nærmest kamera) og Erling Øyasæter (lengst fra kamera). Erik Solbakken, Oscar Stabel Helvig i midten (foto: Balint Czucz)
Andris Hamreonsdag 27. juni 2018 10:35

Sist helg debuterte Erling Øyasæter frå Os under verdscupstemnet i Linz i Austerrike. Han var tatt ut til å ro dobbelttoer saman med Jørgen Nilsson.

– Det løpet gjekk ikkje som forventa. Vi rauk ut i oppsamlingsheatet og var svært skuffa over eigen innsats.

– Vi sat og deppa i lagsteltet rett etter løpet då landslagstrenaren kom bort til meg og sa at eg måtte hoppa inn for Martin Helseth, som hadde problem med ryggen, i dobbeltfiraren, fortel Øyasæter til Midtsiden.

I den båten sat frå før Erik Solbakken, Oscar Stabel Helvig og Olaf Tufte.

– Ei sjuk oppleving

For Øyasæter var det berre å få på seg utstyret og komma seg ut i båten.

– Vi tok oss vidare frå oppsamlingsheatet og vidare til semifinalen. Den blei sånn passe, slik at vi kom til B-finalen. I den hadde nok gutta gitt litt opp, så det blei ikkje det heilt store løpet for vår del.

– For min eigen del så var det ein sjuk oppleving å få ro saman med den gjengen der. Dei er skikkeleg gode.

Klare tilbakemeldingar

Om å få ro med verdsstjerna og rolegenda Olaf Tufte seier Øyasæter at det var litt skummelt, men utruleg lærerikt.

– Olaf er veldig ærleg i tilbakemeldingane sine. Du får høyre det om du ikkje gjer som du skal. Han er veldig sjef, så i båten var det berre å gjera som han sa.

– Samstundes så var det veldig lærerikt. Han, og dei to andre, tok meg umiddelbart med som ein del av laget og kom med konstruktive og gode tilbakemeldingar.

– Då eg fekk beskjed om at eg skulle ro med dei så gjekk eg bort til Olaf. Tilbakemeldinga då var også veldig tydeleg; – Du skal berre følgje oss og ikkje gjera noko anna!

– Utruleg kult

Os-roaren fortel at det var spesielt å debutera i verdscupen.

– Det var utruleg kult å vera med på. Du møter jo stjernene som du har sett opp til, og plutseleg så står dei ved siden av deg.

– Kva er det neste no?

– Eg venter på ei tilbakemelding på om eg får ro dobbelt i Henley Royal Regatta i London. Det er ein av dei største regattaene i verda, med ei veldig spesiell ramme rundt med veldig mykje publikum. Blant anna så må roarane gå med blazer når dei går langs bredden. Landslaget har vald denne regattaen i staden for tredje runde i verdscupen.

– Etter det så kan EM i august vera aktuelt, før det er VM i september, oppsummerer Øyasæter.

Spennande? Vil du ha ukas høgdepunkt i innboksen?

Les meir om

Hald deg oppdatert med Midtsiden

Få tilgang til alt innhald frå Midtsiden-redaksjonen. Som abonnent hjelper du oss på veg til å kunna dekka endå meir av det som skjer i Os!

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.