Ervikane laurdag kveld. (Foto: Tor Arne Hitland)
Ervikane laurdag kveld. (Foto: Tor Arne Hitland)

Ervikane blei forvandla til ein campingplass

Over 50 telt og 30 hengekøyar i pinsehelga.

Kjetil Vasby Bruarøy
01. juni 2020 - 10:53

Med gode vêrmeldingar for heile pinsen, og eventuelle utanlandsreiser avlyst grunna korona, har alt lagt til rette for fine fridagar i eige nærområde.

Mobergsvikjo og bryggene i sentrum har hatt mange badegjestar, Bunnpris Vedholmen har hatt kø rundt hushjørnet (maks 8 i butikken) og måtte laurdag kveld få påfyll av bensin.

Mange har òg overnatta i båt, telt eller hengekøye.

I Ervikane på Strøno er det ofte mykje folk, men laurdag var det uvanleg mange - og dei fleste rigga seg til for overnatting.

Tett med telt laurdag kveld. (Foto: Kjetil Vasby Bruarøy)
Tett med telt laurdag kveld. (Foto: Kjetil Vasby Bruarøy)

53 telt og 32 hengekøyar

Ein av dei som kom tidleg laurdag for å finna seg ein plass, var Tor Arne Hitland og ungane.

– Vi har litt over 50 netter i året i telt, og vi er ofte i Ervikane både med og utan telt, seier Tor Arne. 

Han er òg aktiv medlem i Os Turlag/DNT og Turboklubben.

– Det har vore mykje folk her før, men eg har aldri sett noko liknande. Det var som ei folkevandring ned til dei ulike fjørene og ut på svaberga, fortel Tor Arne.

– Stemning som ein campingplass. (Foto: Tor Arne Hitland)
– Stemning som ein campingplass. (Foto: Tor Arne Hitland)

På veg til å setja opp sitt eige telt så byrja han å telja. Han kom til 53 telt og 32 hengekøyar.

Ungane i naboteltet sykla til parkeringsplassen i telte 77 bilar. I tillegg var det fleire stora båtar til kai og på svai.

Til kai og på svai. (Foto: KVB)
Til kai og på svai. (Foto: KVB)

– Stemning som ein campingplass

Også Oksabåsen og Kuskjeret var godt bemanna. Mens osingar kanskje helst leiter etter ein plass for seg sjølv, anten dei skal på badetur eller telttur, var det i helga berre til å gi opp å finna ein krok for seg sjølv i friluftsområda vest på Strøno.

– Sånn det blei i Ervikane i helga, minnar meg om den fine steminga du finn på camingplassar. Ungane fann nye vener og leika til seint på kveld, vaksne sat saman rundt grill og bål.

– Sjølv hadde eg telt ved sidan av nokre hyggelege folk frå Arna, som besøkte Ervikane for første gong.

– Og alle la seg samtidig, eller var det ungdomar og høg musikk til langt på natt?

– Det var unge par og venegjengar, som grilla og gjekk og la seg, men ikkje noko støy utover kvelden. Det kom sigande ein festflåte forbi på kvelden, med Smokie-musikk på full guffe, men det syntest eg berre var koseleg.

Nokre la seg ut i kveldssola med hengekøyen. (Foto: KVB)
Nokre la seg ut i kveldssola med hengekøyen. (Foto: KVB)

Boss og toalett kan bli utfording

Besøksmengda vi såg på ulike friluftsområde i helga, kan vera ein forsmak på korleis sommaren blir, når regjeringa ber oss feriera heime.

– Eg synest det er veldig kjekt at endå fleire finn gleden av å bruka eigne nærområde, og reiser litt rundt i Noreg og opplever nye.

Men noko bør kanskje gjerast med kapasiteten til dei mest populære områda.

– Ervikane har jo berre desse to toaletta, og fleire er nok framleis opptatt av smittevern, og heldt seg unna dette.

– Folk gjekk heldigvis eit stykke til skogs, men det ligg nok ein del igjen etter gjestane denne helga.

Hitland håper BOF har førebudd seg på ein travel sommar, med opptrappa tømmefrekvens på boss.

– Det burde òg kunna gå an å setja ut fleire toalett, sånne som skulle stått på festivalar denne sommaren. Får vi fint vêr i sommar, så kan det bli endå fleire folk enn vi såg i helga.

Også nabområdet Kuskjeret hadde godt besøk. (Foto: KVB)
Også nabområdet Kuskjeret hadde godt besøk. (Foto: KVB)

 

Les meir om

Korona Sport Fritid Reise