Backstage-sjef Even Andersen (t.h.) saman med Rokne, Hylland og Alnes frå styret i Osfest. (Foto: Kjetil Vasby Bruarøy)

Even har dei mest attraktive oppgåvene

Osfest: Måndag startar dei frivillige å førebu til årets festival. Arrangørane jaktar framleis etter fleire.

Av: Kjetil Vasby Bruarøy

Rundt 300 frivillige har kvart år deltatt for å gjennomføra Osfest.

Nokre jobbar fredag og får dagspass laurdag, andre jobbar fire dagar før festivalen og får pass til både seg og sambuar heile helga.

Då arrangørane i går, seks dagar før festivalstart, sto på Amfisenteret for å registrera fleire, var dei oppe i knappe 200.

– Vi klarer oss med færre enn 300, og nokre av dei vi allereie har deltar både før og under festivalen. Men vi har plass til fleire, spesielt til laurdagen, seier festivalsjef Tor Egil Hylland.

Mange unge vil jobba backstage

Dei frivillige er frå 16 år til over 70. Desse blir fordelte på ulike arbeidsgrupper, frå rigging og rydding til servering og tryggleik.

Éi av arbeidsgruppene er ekstra attraktiv.

– Det er alltid mange som spør om å få jobba backstage. Nokre av dei tenkjer nok at det kan vera spennande å koma tett på kjente musikarar, seier leiar for backstage under Osfest, Even Andersen.

Han har framleis tre ledige plassar på laget sitt, og plukker sjølv ut kven han vil ha med.

– Dei som skal jobba på mitt lag må vera fylt 20 år, sidan det er alkohol i backstageområdet. Dei bør vera moden og løysingsorientert, og kunna ta avgjerder på eiga hand.

Ved sidan av servering og rydding for musikarane, kan det handla om å ordna småting utanom det som er planlagt og bestilt.

– Det kan vera alt frå å skaffa eit par solbriller til at eit band på fire brått spør om vi kan skaffa sushi.

Frå Verdens Ende til Os

Måndag klokka 16 blir festivalområdet på grusplassen gjerda inn, tysdag ettermiddag kjem scenen med danskebåten.

– Den har visst stått på Verdens Ende, fortel Hylland.

Madrugada spelte på Verdens Ende på Tjøme i går, delar av transporten av scenen går altså sjøvegen.

Osfestprogrammet:

FREDAG
18:15 Vivillain
19:25 Sipher
21:00 Sondre Justad
23:00 Smash Into Pieces
00:30 Stage Dolls

LAURDAG
Intimkonsert i VIP-området med Claus og Marius.
18:00 This Was My Life
19:30 Heine Totland´s Rock & Roll Circus
21:00 Admiral P.
22:45 Violet Road
00:30 Waterwagon

Fleire saker