Fann bæsj og bikini

I førre veke fortalte vi om ein turgåar som reagerer med store mengder menneskeavføring på populære friluftsområde.

No ser det ut som om do-vanene frå Haugsdalen har nådd Ervikane. Ikkje nok med det, avføringa ligg rett bak utedoen, saman med ein bikini.

– Eg forstår at det kan bli kraftig aroma inne på utedoen når temperaturen ute nærmar seg 30 gradar, men skal du skita utandørs kan du i det minste gå eit stykke til skogs og prøva å skjula det betre enn dette, synest Tor Arne Hitland.

Var på ryddeoppdrag

Hitland jobbar for Vartun oppfølgingsteneste med praktisk arbeid for brukarane i prosjektet «Livskvalitet».Dei har blant anna avtale med Bergen Omland Friluftsråd om stell og drift av områda i Os.

– Vi har vore rundt og rydda på BOF sine friluftsområde, og osingane skal ha skryt, dei har vore utruleg flinke til å rydda etter seg dei siste godvêrsdagane.

Gruppa har blant anna vore på Kuskjeret og tømt utedoen og på Kalneset og slått plenen. Det einaste bosset dei har funne er éin eingongsgrill, og den var i Skeisstøa.

– Om dei som er på tur i Os også skjerpar do-vanene sine òg no, så blir dette bra.

Friluftsfolk som ikkje gidd å gå?

Prosjektgruppa har sjølv rusta opp Ervikane med ny drenering, nye stiar og ny gapahuk. Gapahuken er eit stykke frå utedoen, i eit område der det er vanleg å setja opp telt.

– Også midt på ein sti bak gapahuken har vi funne avføring. Det hadde vore bra om dei som søv i telt tok seg ein spasertur til utedoen, eller grov eit hol i bakken i skogen over fjøra, i staden for å skita der andre skal gå og ungar skal leika.