Lokal | 13. sep. 2013

Fann drepne sauar

To sauar er funnen drepne ved foten av Borgafjellet. Rovdyrekspert trur dei er tatt av hund og bonden håper hundeeigar melder seg.

Ein av dei to døde sauane som blei funnen tysdag 10. september. (Privat foto)
Kjetil Vasby Bruarøy
Kjetil Vasby Bruarøyfredag 13. sep. 2013 20:42

Tysdag formiddag fekk sauebonde Einar Borgen melding frå ein turgåar som hadde funne to av sauane hans drepne.

Sauane gjekk på beite ved Borgavegen.

– Dei må ha blitt tatt mellom klokka 20 måndag kveld og 10 tysdag formiddag, seier Borgen.

Sauane hadde merke etter bitt i halsen, men var ikkje blitt ete på.

– Neppe rev

Borgen kontakta Statens naturoppsyn for å bli sikker på kva dyr som hadde tatt sauane.

– Du skal ikkje ropa ulv for tidleg, sånn er det vel med hund òg, seier Einar.

Rovviltkontakt Hartvig Haugan møtte opp hos Borgen og har fått utført obduksjon på dyra.

– Vi konkluderte med at det er antatt hund som står bak. Det er ganske strenge krav for å slå dette fast, men det er ikkje ulv i Os og det er fleire indikasjonar på hund, seier Hartvig.

– Er rev eit alternativ?

– Eg har sett ein del revedrap og dette liknar ikkje. Det er hol etter store tenner og det er rive og slite ein del i dyret, noko som også er typisk for hundar.

Håper hundeeigar tar kontakt

Dei drepne sauane gjekk i ein flokk på 115 dyr, halvparten kvite norske sauar, halvparten gamal norsk spelsau.

– Eg har hatt sauar i 10 år, men aldri vore med på noko liknande.

– No håper eg at hundeeigarar i området, som har hatt hunden laus måndag kveld eller tysdag formiddag, tar kontakt.

Borgen er også interessert i tips om det er nokon som har sett lause hundar i nærleiken på denne tida.

– Vi held området ope med fleire grinder, så turgåarar lett kan koma seg til Borgafjellet. Eg håper vi finn ut kva hund som står bak, at vi får dialog med eigar, og at dette ikkje skjer fleire gongar.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.