Fann flaskepost på fjorden

– Vi hadde vore og fiska, og kom frå Austevoll til Øyane då eg såg flaska, fortel Evy Renate Fyllingen.

Om ho ser plast og anna boss som flyter i sjøen, plar ho plukka det med seg.

– Det blir ein del tomflasker blant alt bosset, så dei går naturlegvis til pant.

Oppdaga brev

Fredag sorterte ho flaskene ho har funne i det siste, blant desse var den som låg ute ved Gulholmane onsdag.

– Det var då eg oppdaga at det var noko inni flaska.

På brevet står det skrive: «til som finner» og noko med «sydn» - saman med teikningar og klistremerke av hest, barbie og pokemon.

– Det er vanleg å seia ifrå når du har funne flaskepost, så den som har sendt får veta at den er funnen. No er eg spent på kor lenge denne her vore på rek, og kvar den er sendt frå, seier Evy.

OPPDATERT: Les kven som sendte flaskeposten - for fire år sidan!

I fjor blei det funne ti år gamal flaskepost i Ervikane, i 2011 blei det funne flaskepost i Øyane sendt frå Orknøyane i 2007.